எலெக்ட்ரிக் மோட்டார்சைக்கிள் உற்பத்தியாளரான கோமகி இந்திய சந்தையில் முதல் எலெக்ட்ரிக் குரூயிசர் மோட்டார்சைக்கிளை அறிமுகம் செய்ய இருக்கிறது. கோமகி ரேன்ஜர் எனும் பெயரில் இந்த மோட்டார்சைக்கிள் அறிமுகமாக இருக்கிறது.
புதிய கோமகி ரேன்ஜர் மாடலுக்கான டீசர் அதிகாரப்பூர்வமாக வெளியிடப்பட்டு இருக்கிறது. டீசரில் மோட்டார்சைக்கிளின் ஹெட்லேம்ப் காணப்படுகிறது. மேலும் இந்த மாடல் கிளாசிக் தோற்றம் கொண்டிருக்கும் என்றும் தெரியவந்துள்ளது. முழு சார்ஜ் செய்தால் கோமகி ரேன்ஜர் மாடல் 250 கிலோமீட்டர் வரை செல்லும் என கூறப்படுகிறது.
இந்தியாவில் புதிய கோமகி ரேன்ஜர் மாடல் அடுத்த ஆண்டு ஜனவரி மாத வாக்கில் அறிமுகம் செய்யப்பட இருக்கிறது. புதிய எலெக்ட்ரிக் குரூயிசர் மாடலில் நான்கு கிலோவாட் பேட்டரி வழங்கப்பட இருக்கிறது. இதுவரை இந்தியாவில் விற்பனை செய்யப்படும் எந்த எலெக்ட்ரிக் இருசக்கர வாகனத்திலும் இத்தகைய பேட்டரி வழங்கப்படவில்லை.
கோமகி ரேன்ஜர் மாடலில் 5000 வாட் மோட்டார் வழங்கப்பட இருக்கிறது. இத்துடன் இந்த எலெக்ட்ரிக் குரூயிசர் மாடலில் குரூயிஸ் கண்ட்ரோல், ரிப்பேர் ஸ்விட்ச், ரிவர்ஸ் ஸ்விட்ச், ப்ளூடூத் மற்றும் அட்வான்ஸ்டு பிரேக்கிங் சிஸ்டம் உள்ளிட்டவை வழங்கப்படுகிறது.
