ஆண்ட்ராய்டு மற்றும் ஐ.ஓ.எஸ். செயலியில் டுவீட்ஸ்டார்ம் அம்சம் மீண்டும் சோதனை

புதுடெல்லி:

டுவிட்டர் டுவீட்ஸ்டார்ம் அம்சத்தை ஆண்ட்ராய்டு செயலியில் சோதனை செய்து வருகிறது. இந்த அம்சம் முன்னதாக செப்டம்பர் மாதத்தில் சோதனை செய்யப்பட்டது. இம்முறை இந்த அம்சம் டுவிட்டர் ஆல்ஃபா மற்றும் பீட்டா பதிப்பு செயலியை பயன்படுத்துவோருக்கு வழங்கப்பட்டு வருகிறது.

இந்நிலையில் ஐ.ஓ.எஸ். மற்றும் ஆண்ட்ராய்டு இயங்குதளத்தில் ஆல்ஃபா மற்றும் பீட்டா பதிப்பு செயலிகளை பயன்படுத்தும் தேர்வு செய்யப்பட்ட வாடிக்கையாளர்களுக்கு மட்டும் வழங்கப்பட்டு வருவதை டுவிட்டர் உறுதி செய்துள்ளது. புதிய அம்சம் தொடர்ச்சியான டுவிட்களை அடுத்தடுத்த அனுப்புவதை எளிமையாக்கும்.



புதிய அம்சம் நீண்ட டுவீட்களை அடுத்தடுத்து தனியாக அனுப்ப வழி செய்யும். இதனால் டுவீட்ஸ்டார்ம் மூலம் ஒரே கிளிக் மூலம் அனைத்து டுவிட்களையும் அனுப்ப முடியும்.

டுவிட்டர் தளத்தில் டுவீட் செய்ய 140 வார்த்தைகள் அனுமதித்த நிலையில், சமீபத்தில் இந்த எண்ணிக்கை 280 வார்த்தைகளாக நீட்டித்தது. புதிய டுவீட்ஸ்டார்ம் அம்சம் மூலம் மூன்றாம் தரப்பு செயலிகளின் உதவியின்றி நீண்ட டுவீட்களை மிக எளிமையாக மேற்கொள்ள முடியும்.

பொதுமக்களுக்கு டுவீட்ஸ்டார்ம் அம்சம் வழங்குவது குறித்து டுவிட்டர் சார்பில் எவ்வித தகவலையும் வழங்கவில்லை. எனினும் டுவிட்டர் ஆல்ஃபா செயலியை தரவிறக்கம் செய்து புதிய அம்சத்தை சோதனை செய்ய முடியும்.