மேட்டூர் அணைக்கு நீர்வரத்து 104 கன அடியாக குறைந்தது
- மேட்டூர் அணைக்கு நேற்று காலை 174 கன அடியாக இருந்த நீர்வரத்து, இன்று காலை விநாடிக்கு 104 கன அடியாக சரிந்துள்ளது.
- நேற்று காலை 83.35 அடியாக இருந்த நீர்மட்டம் இன்று காலை நீர்மட்டம் 82.34 அடியாக சரிந்தது.
மேட்டூர்:
காவிரி நீர்ப்பிடிப்பு பகுதிகளில் பெய்யும் மழையை பொறுத்து ஒகேனக்கல், மேட்டூர் அணைக்கான நீர்வரத்து அதிகரிப்பதும், சரிவதுமாக உள்ளது.
ஒகேனக்கல் காவிரியில் நேற்று முன்தினம் விநாடிக்கு 1000 கன அடியாக இருந்த நீர்வரத்து நேற்று காலை நிலவரப்படி 700 அடியாக சரிந்துள்ளது.
அதே சமயம், மேட்டூர் அணைக்கு நேற்று காலை 174 கன அடியாக இருந்த நீர்வரத்து, இன்று காலை விநாடிக்கு 104 கன அடியாக சரிந்துள்ளது.
மேட்டூர் அணையில் இருந்து காவிரி டெல்டா பாசனத்திற்காக விநாடிக்கு 12 ஆயிரம் கன அடி வீதம் தண்ணீர் காவிரி ஆற்றில் திறந்து விடப்பட்டு வருகிறது.
அணைக்கு வரும் நீரின் அளவை விட அணையில் இருந்து பாசனத்திற்கு திறக்கப்படும் தண்ணீர் அளவு அதிகமாக உள்ளதால் மேட்டூர் அணை நீர்மட்டம் வேகமாக குறைந்து வருகிறது.
நேற்று காலை 83.35 அடியாக இருந்த நீர்மட்டம் இன்று காலை நீர்மட்டம் 82.34 அடியாக சரிந்தது. நீர் இருப்பு 44.32 டி.எம்.சி.யாக உள்ளது.