டி20 கிரிக்கெட் ஐ.சி.சி.தர வரிசை பட்டியல் - 15 இடத்திற்கு தள்ளப்பட்டார் கோலி

சர்வதேச கிரிக்கெட் கவுன்சில் டி20 போட்டிகளுக்கான வீரர்களின் புதிய தரவரிசை பட்டியலை நேற்று வெளியிட்டது. 

இதில் பேட்ஸ்மேன்கள் தரவரிசையில் இந்திய வீரர் ஸ்ரேயாஸ் அய்யர் 27 இடங்கள் முன்னேறி 18-வது இடத்தை பிடித்துள்ளார். அண்மையில் நடைபெற்ற இலங்கைக்கு எதிரான தொடரில்  3 ஆட்டங்களிலும் அவர் அரைசதம் அடித்ததால் தர வரிசையில் அவர் முன்னேற்றம் கண்டுள்ளார். 

இந்திய அணியின் முன்னாள் கேப்டன் விராட் கோலிக்கு டி20 தர வரிசையில் பின்னடைவு ஏற்பட்டுள்ளது. அவர் 5 இடங்கள் சரிந்து 15-வது இடத்துக்கு தள்ளப்பட்டார். இதே போல் இந்தியாவின் லோகேஷ் ராகுல் 4 இடம் குறைந்து 10-வது இடத்துக்கு பின்தங்கினார். 

ரோகித் சர்மா 13-வது இடத்தில் உள்ளார். பாகிஸ்தான் கேப்டன் பாபர் அசாம் முதலிடத்தில் தொடருகிறார். பந்து வீச்சாளர்கள் பட்டியலில் இந்திய வேக பந்து வீச்சாளர் புவனேஷ்குமார் மூன்று இடங்கள் முன்னேறி 17வது இடத்தை பிடித்தார்.