ரஞ்சி டிராபி: மும்பையை துவம்சம் செய்தது ரெயில்வேஸ்- ரகானே, பிரித்வி ஷா ஏமாற்றம்

ரஞ்சி டிராபி கிரிக்கெட்டில் 2-ம் கட்ட போட்டிகள் நேற்றுமுன்தினம் தொடங்கியது. மும்பையில் நடைபெற்ற ஆட்டத்தில் மும்பை - ரெயில்வேஸ் அணிகள் மோதின.

டாஸ் வென்ற ரெயில்வேஸ் அணி பந்து வீச்சை தேர்வு செய்தது. பிரித்வி ஷா, ரகானே, சூர்யகுமார் யாதவ், சித்தேஷ் லாட், ஆதித்யா டரே ஆகிய முன்னணி வீரர்களுடன் களம் இறங்கிய மும்பை அணி ரன்களை குவிக்கும் என எதிர்பார்க்கப்பட்டது.

ஆனால் ரெயில்வேஸ் அணியின் பந்து வீச்சை தாக்குப்பிடிக்க முடியாமல் 114 ரன்னில் சுருண்டது. பிரித்வி ஷா 12 ரன்னும், ரகானே 5 ரன்னும் சேர்த்தனர். கேப்டன் சூர்யகுமார் யாதவ் அதிகபட்சமாக 39 ரன்கள் சேர்த்தார். ரெயில்வேஸ் அணி சார்பில் பிரதீப் 6 விக்கெட்டும், மிஸ்ரா 3 விக்கெட்டும் வீழ்த்தினர். மும்பை 28.3 ஓவர்களே தாக்குப்பிடித்தது.

பின்னர் ரெயில்வேஸ் முதல் இன்னிங்சை தொடங்கியது. தொடக்க வீரர்கள் சொதப்பினாலும், கேப்டன் கரண் சர்மா 112 ரன்களும், கோஷ் 72 ரன்களும் அடிக்க 266 ரன்கள் குவித்தது.

152 ரன்கள் பின்தங்கிய நிலையில் மும்பை அணி 2-வது இன்னிங்சை தொடங்கியது. 2-வது இன்னிங்சிலும் மும்பை வீரர்கள் திணறினர். 2-வது இன்னிங்சிலும் சூர்யகுமார் யாதவ் (65) மட்டும்தான் சிறப்பாக விளையாடினர். மற்ற வீரர்கள் சொதப்ப மும்பை 198 ரன்னில் சுருண்டது.

ரெயில்வேஸ் அணியை விட 46 ரன்களே கூடுதல் பெற்றிருந்தது. 47 ரன்களை விக்கெட் இழக்காமல் அடித்த ரெயில்வேஸ் அணி 10 விக்கெட் வித்தியாசத்தில் அபார வெற்றி பெற்றது.