நான்கு வீரர்கள் சதம்: வங்காள தேசத்திற்கு எதிராக தென்ஆப்பிரிக்கா 573 ரன்கள் குவிப்பு

தென்ஆப்பிரிக்கா - வங்காள தேசம் அணிகளுக்கு இடையிலான 2-வது டெஸ்ட் பிளோயம்ஃபோன்டின் மைதானத்தில் நேற்று தொடங்கியது. டாஸ் வென்ற வங்காள தேச அணி கேப்டன் முஷ்பிகுர் ரஹிம் பீல்டிங் தேர்வு செய்தார். அதன்படி தென்ஆப்பிரிக்கா அணியின் டீன் எல்கர், மார்க்கிராம் ஆகிய தொடக்க வீரர்களாக களம் இறங்கினார்கள்.

இருவரும் வங்காள தேசத்தின் பந்து வீச்சை நேர்த்தியாக எதிர்கொண்டு ரன்கள் குவித்தனர். தொடக்க வீரர்களை பிரிக்க வங்காள தேச பந்து வீச்சாளர்கள் எவ்வளவோ முயற்சி செய்தனர். ஆனால் பலனளிக்கவில்லை. 8 பேர் பந்து வீசினார்கள். 8 பேரின் பந்து வீச்சையும் விளாசிய இருவரும் சதம் அடித்தனர்.

தென்ஆப்பிரிக்காவின் ஸ்கோர் 243 ரன்னாக இருக்கும்போது டீன் எல்கர் 113 ரன்கள் எடுத்த நிலையில் ஆட்டம் இழந்தார். மறுமுனையில் விளையாடிய மார்க்கிராம் 143 ரன்கள் குவித்து ஆட்டம் இழந்தார்.

4-வது விக்கெட்டுக்கு அம்லா உடன் கேப்டன் டு பிளிசிஸ் ஜோடி சேர்ந்தார. இந்த ஜோடியும் சிறப்பான ஆட்டத்தை வெளிப்படுத்தியது. இதனால் தென்ஆப்பிரிக்கா அணி முதல் நாள் ஆட்ட முடிவில் 90 ஓவரில் 3 விக்கெட் இழப்பிற்கு 428 ரன்கள் குவித்தது. அம்லா 89 ரன்னுடனும், டு பிளிசிஸ் 62 ரன்னுடனும் ஆட்டமிழக்காமல் இருந்தனர்.

இன்று 2-வது நாள் ஆட்டம் தொடங்கியது. அம்லா, டு பிளிசிஸ் ஆகியோர் தொடர்ந்து விளையாடினார்கள். இருவரும் சிறப்பாக விளையாடி சதம் அடித்தார்கள். அம்லா 132 ரன்கள் எடுது்த நிலையில் ஆட்டம் இழந்தார். அடுத்து டி காக் களம் இறங்கினார்.



தென்ஆப்பிரிக்கா 120 ஓவரில் 4 விக்கெட் இழப்பிற்கு 573 ரன்கள் குவித்திருந்த நிலையில் முதல் இன்னிங்சை டிக்ளேர் செய்தது. டு பிளிசிஸ் 135 ரன்னுடனும், டி காக் 28 ரன்னுடனும் களத்தில் இருந்தனர். எல்கர் - மார்க்கிராம் ஜோடி முதல் விக்கெட்டுக்கு 243 ரன்கள் குவித்த நிலையில், அம்லா - டு பிளிசிஸ் ஜோடி 4-வது விக்கெட்டுக்கு 247 ரன்கள் குவித்தது.

வங்காள தேச அணி சார்பில் சுபாஷிஸ் ராய் 118 ரன்கள் விட்டுக்கொடுத்து 3 விக்கெட்டுக்ளக் வீழ்த்தினார். பின்னர் வங்காள தேசம் முதல் இன்னிங்சை தொடங்கியுள்ளது.