பெண்ணை தாக்கி மோட்டார் சைக்கிள் எரிப்பு

புதுச்சேரி:

திருக்கனூர் அருகே காட்டேரிக்குப்பம் புதுநகர் 2-வது தெருவை சேர்ந்தவர் குமார். இவரது மனைவி சுமதி (வயது46). குமார் கடந்த சில ஆண்டுகளுக்கு முன்பு இறந்து விட்டார். இதையடுத்து சுமதி தனது மகன் வசந்த்துடன்(26) வசித்து வருகிறார்.

சுமதி அங்குள்ள தனியார் நிறுவனத்தில் வேலை செய்து வருகிறார். சுமதி வேலைக்கு நடந்து சென்றுகொண்டிருந்தார். அப்போது அதே பகுதியை சேர்ந்த ரகுராமன் என்பவர் சுமதியின் கையை பிடித்து இழுத்து நீ என்னுடன்தான் இருக்க வேண்டும் என்று தகராறு செய்தார்.

மேலும் சுமதியின் ஆடையை கிழித்து மானபங்கம் செய்ததோடு தகாத வார்த்தை களால் ரகுராமன் திட்டினார். அதனை பொறுத்துக் கொண்டு சுமதி வேலைக்கு சென்று விட்டார். ரகுராமன் மீண்டும் சுமதியின் வீட்டுக்கு வந்து கத்தியை காட்டி கொலை செய்து விடுவதாக மிரட்டினார்.

இதனால் பயந்து போன சுமதி வீட்டின் கதவை உள்பக்கமாக பூட்டிக் கொண்டார். இதனால் ஆத்திரமடைந்த ரகுராமன் கத்தியால் வீட்டின் கதவை சேதப்படுத்திவிட்டு சென்று விட்டார்.

இதுகுறித்து சுமதி காட்டேரிக்குப்பம் போலீசில் புகார் செய்தார். போலீசார் விசாரணை நடத்தி  வந்த நிலையில் இதனையறிந்த ரகுராமன் தனது மனைவி பாக்கியவதி மற்றும் மகள் ஜான்சிராணியுடன் சுமதியின் வீட்டுக்கு வந்தார். 

அங்கு சுமதியிடம் எங்கள் மீதே போலீசில் புகார் கொடுக்கிறாயா? என கூறி அவர்கள் சுமதியின் முடியை பிடித்து இழுத்து தாக்கினர். 

மேலும் காலால் வயிற்றில் எட்டி உதைத்தனர். இனிமேல் உங்களால் இந்த ஊரிலேயே இருக்க முடியாது உங்களை காலி செய்து விடுவோம் என்று கொலை மிரட்டல் விடுத்துவிட்டு சென்று விட்டனர்.

சுமதி வீட்டில் தனியாக தூங்கி கொண்டிருந்த போது நள்ளிரவில் சத்தம் கேட்டு வெளியே வந்து பார்த்தார். அப்போது ரகுராமன் வீட்டு முன்பு நிறுத்தியிருந்த சுமதியின் மகன் மோட்டார் சைக்கிளை பெட்ரோல் ஊற்றி தீ வைப்பதை கண்டு சுமதி திடுக்கிட்டார். அப்போது மீண்டும் ரகுராமன் கொலை செய்து விடுவதாக சுமதியை மிரட்டிவிட்டு சென்றார். 

இதுகுறித்து சுமதி காட்டேரிக்குப்பம் போலீசில் புகார் செய்தார். போலீசார் வழக்கு பதிவு செய்து விசாரணை நடத்தி வருகிறார்கள்.