புதுவை ஜிப்மரில் பட்டமளிப்பு விழா ரத்து

புதுச்சேரி:

ஜிப்மர் மருத்துவமனை நிர்வாகம் வெளியிட்டுள்ள செய்தி குறிப்பில் கூறியிருப்பதாவது:-

ஜிப்மர் மருத்துவ பட்ட மேற்படிப்பு மற்றும் ஆராய்ச்சி நிறுவனத்தில் எம்.பி.பி.எஸ். மருத்துவப் படிப்பிற்கான மாணவர் சேர்க்கைக்காக தனியாக தேர்வு நடத்தப்பட்டு வந்தது. நடப்பு கல்வியாண்டு முதல் (2020-2021) ‘நீட்’ தேர்வு முறையே பின்பற்றப்படும்.

ஆனாலும் ஜிப்மர் நிறுவனத்தின் சட்ட திட்டங்களின் அடிப்படையில் அனைத்து இட ஒதுக்கீடு மற்றும் இருப்பிட தகுதிகளுக்கான வாய்ப்புகளும் பாதுகாக்கப்படும். புதுச்சேரி, காரைக்காலில் உள்ள 2 மையங்களுக்கும் இது பொருந்தும். இது சார்ந்த அனைத்து அதிகாரப்பூர்வமான தகவல்களும் எம்.பி.பி.எஸ். இளநிலை மருத்துவ படிப்பின் அனுமதி தேர்வுக்கான ‘புரோஸ்பெக்டஸ்’ எனப்படும் தொகுப்பில் தெரிவிக்கப்பட்டுள்ளது. ஜிப்மரின் அதிகாரபூர்வ இணையதளமான www.jipmer.edu.in-லும் தெரிந்து கொள்ளலாம்.

கொரோனா காரணமாக பாதுகாப்பை கருத்தில் கொண்டு இந்த ஆண்டு ஜிப்மரில் பட்டமளிப்பு விழா ரத்து செய்யப்பட்டுள்ளது. பட்டம் பெறுவதற்கு தகுதியுள்ளவர்கள் அனைவரும் அதற்கான அதிகாரபூர்வ இணையதளத்தில் கொடுக்கப்பட்டுள்ள முறைப்படி விண்ணப்பிக்க வேண்டும். அவர்களுக்கு பட்டச் சான்றிதழ்கள் தபால் வழியாக அனுப்பி வைக்கப்படும்.

இவ்வாறு அதில் தெரிவிக்கப்பட்டுள்ளது.