தடகள வீரரின் கனவு - கிளாப் விமர்சனம்

தடகள வீரரான கதாநாயகன் (ஆதி) பல கனவுகளோடு பயணிக்கும் இளைஞன். எதிர்ப்பாராத விதமாக ஏற்படும் ஒரு விபத்தில் தனது காலையும், தனது தந்தை பிரகாஷ் ராஜையும் இழந்துவிடுகிறார். இதனால் தன்னுடைய கனவான தேசிய தடகள போட்டியில் பங்கேற்க முடியாமல் போய்விடுகிறது. தன்னுடைய கனவுகளை இழந்ததால் மன உளைச்சலில் வாழ்க்கையை வெறுக்கும் ஆதி, தான் காதலித்த கதாநாயகியை (ஆகான்ஷா சிங்) பிரிந்துவிட நினைக்கிறார். ஆனால், ஆதியின் மீது ஏற்பட்ட காதலால் அவரை பிரியமுடியாமல் உடனடியாக திருமணம் செய்து கொள்ள முடிவெடுத்து இருவரும் திருமணம் செய்து கொள்கிறார்கள்.

தான் அடைய முடியாத ஆசையை நிறைவேற்ற, தடகள வீரர்களை தேடுகிறார் ஆதி. இதனிடையே மதுரையில் உள்ள ஒரு பெண் (கிரிஷா குருப்) விளையாட்டு வீரரைப் பற்றி அறிந்து கொண்டு தன்னால் சாதிக்க முடியாததை, அந்த பெண் சாதித்து தேசிய சாம்பியனாக வேண்டும் என்று பயிற்சி அளிக்கிறார். 

இறுதியில் விளையாட்டு வீரர் ஆதியின் ஆசை நிறைவேறியதா? ஆதியின் ஆசையை தடுப்பவர்கள் யார்? தடுக்க காரணம் என்ன? என்பதே இப்படத்தின் மீதிக்கதை.

காலை இழந்த ஆதி சிறப்பான நடிப்பை வெளிப்படுத்தி அனைவரின் பாராட்டுக்களையும் பெற்றுள்ளார். இயல்பான நடிப்பும், கதைக்கு தேவைப்படுகிற நடிப்பை எதார்த்தமாக வெளிப்படுத்தியுள்ளார். கதாநாயகியாக ஆகான்ஷா சிங் தன்னுடைய கதாப்பாத்திரத்தில் இயல்பாக நடித்துள்ளார். தடகள பெண்ணாக வரும் கிரிஷா குருப் அற்புதமான நடிப்பால் அனைவரையும் கவர்ந்துள்ளார். நாசர் மற்றும் பிரகாஷ் ராஜ் ஆகியோர் முதிர்ச்சியான நடிப்பை கொடுத்துள்ளனர்.

வழக்கமாக வரும் தமிழ் சினிமாவின் கதையாக இருந்தாலும் திரைக்கதை சற்று சுவாரசியாமக்கியுள்ளார் இயக்குனர் பிரித்வி ஆதித்யா. பல படங்களில் இடம்பெற்ற கதையம்சம் கொண்டுள்ளதால் கதையை தீர்மானித்துவிடும்படி அமைந்திருக்கிறது. இன்னும் கதையில் கவனம் செலுத்தியிருக்களாம் என்று மக்களின் கருத்தாகவுள்ளது. 

படத்தின் ஒளிப்பதிவு நல்ல காட்சியமைப்பாக அமைத்துக் கொடுத்திருக்கிறார் ஒளிப்பதிவாளர் பிரவின் குமார். விளையாட்டை மையப்படுத்தி எடுக்கப்பட்ட படம் என்பதால் இவரின் பணி கூடுதலாக கவனிக்கும் படி அமைந்துள்ளது.

இதுவரை பார்த்த இளையராஜாவின் இசையை போன்று இல்லை என்றாலும் இசை படத்திற்கு கூடுதல் பலமே. பின்னணி இசையின் மூலம் படத்தின் கதைகளத்தில் பயணிக்க வைத்திருக்கிறார் இளையாராஜா.

மொத்தத்தில் ‘கிளாப்’ ரசிக்கலாம்.