வைரலாகும் சுந்தர்.சி படத்தின் போஸ்டர்

இயக்குனர் சுந்தர்.சி இயக்கத்தில் கடந்த ஆண்டு வெளியான 'அரண்மனை 3' திரைப்படம் நல்ல வரவேற்பை பெற்றது. தற்போது இவர் மூன்று நாயகர்கள் மற்றும் மூன்று நாயகிகள் நடிக்கும் படத்தை இயக்கி வருகிறார். இப்படத்தில் ஜீவா, ஜெய், ஸ்ரீகாந்த், மாளவிகா சர்மா, அம்ரிதா ஐயர், ரைசா வில்சன் மற்றும் ஐஸ்வர்யா தத்தா உள்ளிட்ட பல முன்னணி நடிகர்கள் நடித்து வருகின்றனர். இவர்களுடன் யோகிபாபு, ரெடின் கிங்ஸ்லி, பிரதாப் போத்தன், விச்சு விஸ்வநாத், சம்யுக்தா ஷண்முகம், திவ்யதர்ஷினி (டிடி), அருணா பால்ராஜ், பேபி விர்த்தி ஆகியோர் நடித்துள்ளனர்.

யுவன் சங்கர் ராஜா இசையமைத்திருக்கும் இப்படத்தை குஷ்புவின் அவ்னி சினி மேக்ஸ் பிரைவேட் லிமிடெட் மற்றும் பென்ஸ் மீடியா நிறுவனங்கள் இணைந்து தயாரித்துள்ளது. விறுவிறுப்பாக நடைபெற்று வந்த இப்படத்தின் படப்பிடிப்பு ஊட்டி மற்றும் அதன் சுற்றுப்புறங்களில் 75 நாட்கள் நடைபெற்று தற்போது இதன் பின்னணி பணிகள் நடந்து வருகிறது.

இந்நிலையில் 'காபி வித் காதல்' என்று பெயரிடப்பட்டுள்ள இப்படத்தின் டைட்டில் மற்றும் பர்ஸ்ட் லுக் போஸ்டர் வெளியாகியுள்ளது. இதனுடன் இப்படம் ஜூலை மாதம் வெளியாகும் என அறிவிக்கப்பட்டுள்ளது. இப்படத்தின் போஸ்டர் தற்போது சமூக வலைத்தளத்தில் வைரலாகி வருகிறது.