‘அய்யப்பனும் கோஷியும்’ தமிழ் ரீமேக்கை இயக்கும் பிரபல தயாரிப்பாளர்?

கடவுளால் ஆசிர்வதிக்கப்பட்ட தேசம் என்று கூறப்படும் கேரள மண்ணில் தயாரான சில படங்கள் உலகம் முழுவதும் கவனத்தை ஈர்க்கும். அந்த வகையில், மலையாளத்தில் கடந்தாண்டு வெளியாகி வெற்றிபெற்ற படம் தான் ‘அய்யப்பனும் கோஷியும்’. சாஷி இயக்கிய இந்தப் படத்தில் அய்யப்பனாக பிஜூமேனனும், கோஷியாக பிருத்விராஜும் நடித்திருந்தனர். 

இரண்டு அதிகாரிகளின் இடையில் ஏற்படும் ஈகோ மோதலை யதார்த்தமாக எடுத்துக் காட்டியது இந்தத் திரைப்படம். இதனால் இந்தப் படத்திற்கு ரசிகர்களிடம் மிகப்பெரிய வரவேற்பு கிடைத்தது. அதைத்தொடர்ந்து ‘அய்யப்பனும் கோஷியும்’ படத்தை தமிழில் தயாரிக்கும் உரிமையை பைவ் ஸ்டார் கதிரேசன் வாங்கினார். இப்படத்தின் தமிழ் ரீமேக்கில் சசிகுமாரும், சரத்குமாரும் நடிக்க உள்ளதாக கூறப்படுகிறது.

இந்நிலையில், அப்படத்தை இயக்கப்போவது யார் என்பது குறித்த தகவல் வெளியாகி உள்ளது. அதன்படி தயாரிப்பாளர் பைவ் ஸ்டார் கதிரேசன், ‘அய்யப்பனும் கோஷியும்’ தமிழ் ரீமேக்கை இயக்க உள்ளதாக கூறப்படுகிறது. இவர் தற்போது ராகவா லாரன்ஸ் நடிக்கும் ருத்ரன் படத்தை இயக்கி வருகிறார். இதையடுத்து ‘அய்யப்பனும் கோஷியும்’ தமிழ் ரீமேக்கை இயக்குவார் என தகவல்கள் தெரிவிக்கின்றன.