கால்பந்து ஜாம்பவான் பெயரில் யோகிபாபு

'பரியேறும் பெருமாள்' படத்துக்கு பிறகு கதிர் ஹீரோவாக நடித்துள்ள படம் ’ஜடா’. தமிழகத்தைச் சேர்ந்த கால்பந்து விளையாட்டு வீரர் ஒருவனின் வாழ்க்கையில் நடக்கும் சுவாரஸ்யமான நிகழ்வுகளையும், சமூகத்தில் நடக்கும் பிரச்சினைகளையும் பேசுகிற படமாக இந்த படம் உருவாகி இருக்கிறது. போயட் ஸ்டுடியோஸ் சார்பில் விக்னேஷ் ராஜகோபால் தயாரித்துள்ள இப்படத்தை குமரன் இயக்கியுள்ளார். 

இந்த படத்தில் கதிருக்கு ஜோடியாக ரோஷினி நடிக்க, யோகி பாபு, சமுத்திரகனி, ஏ.பி.ஸ்ரீதர் உள்ளிட்டோர் முக்கிய வேடங்களில் நடித்துள்ளனர். படப்பிடிப்புகள் முடிந்து தற்போது பின்னணி வேலைகள் நடைபெற்று வருகிறது. இப்படம் வருகிற டிசம்பர் 6-ந் தேதி ரிலீசாக உள்ளது. 

இந்நிலையில், ஜடா படத்தில் யோகிபாபுவின் கதாபாத்திரம் குறித்த தகவலை படக்குழு வெளியிட்டுள்ளது. கால்பந்தாட்ட உலகின் ஜாம்பவானாக திகழும் மெஸ்சி எனும் பெயரில் யோகிபாபு நடித்துள்ளதாக கூறப்படுகிறது. இவர் சமீபத்தில் வெளியான பப்பி மற்றும் பிகில் படங்களில் கால்பந்து வீரராக நடித்திருந்தார் என்பது குறிப்பிடத்தக்கது.