எம்.வி. அகுஸ்டா ரஷ் 1000 விலை விவரங்கள்

எம்.வி. அகுஸ்டா ரஷ் 1000 மோட்டார்சைக்கிள் 2019 இ.ஐ.சி.எம்.ஏ. விழாவில் அறிமுகம் செய்யப்பட்டது. இதன் விலை ஐரோப்பாவில் 34,000 EUR (இந்திய மதிப்பில் ரூ. 26.9 லட்சம்) என நிர்ணயம் செய்யப்பட்டுள்ளது.

புதிய ரஷ் 1000 மோட்டார்சைக்கிள் புருடேல் 1000 மாடலை தழுவி உருவாக்கப்பட்டு இருக்கிறது. புதிய மோட்டார்சைக்கிளில் வட்ட வடிவம் கொண்ட எல்.இ.டி. ஹெட்லேம்ப்கள் எம்.வி. அகுஸ்டா ஆர்.வி.எஸ். #1 மாடலில் இருந்து பயன்படுத்தப்பட்டு இருக்கிறது. இதன் பெட்ரோல் டேன்க்கில் கூர்மையான கோடுகள் மற்றும் கிரீஸ்களை கொண்டிருக்கிறது.

மோட்டார்சைக்கிளின் பின்புறம் வட்ட வடிவம் கொண்ட எல்.இ.டி. டெயில் லேம்ப் வழங்கப்பட்டுள்ளது. இத்துடன் ரஷ் 1000 மாடல் கார்பன் ஃபைபர் வீல் கவர் மற்றும் 04 டீக்கல்களை கொண்டிருக்கிறது. மேலும் இந்த மாடலில் பிரத்யேக, டூயல் டிப் எக்சாஸ்ட் வழங்கப்பட்டுள்ளது.

ரஷ் 1000 மோட்டார்சைக்கிளில் 998சிசி, இன்-லைன் 4 சிலி்ண்டர் என்ஜின் வழங்கப்பட்டுள்ளது. இதே என்ஜின் புருடேல் 1000 ஆர்.ஆர். மாடலிலும் வழங்கப்பட்டுள்ளது. இந்த என்ஜின் 208 பி.ஹெச்.பி. பவர், 116.6 என்.எம். டார்க் செயல்திறன் வழங்குகிறது. இதன் எலெக்டிரானிக் சஸ்பென்ஷனை ஓலின்ஸ் வழங்கியுள்ளது.

எம்.வி. அகுஸ்டா ரஷ் 1000 மாடல் சர்வதேச சந்தையில் 2020 மே மாதத்தில் விற்பனைக்கு வரும் என தெரிகிறது. இந்தியாவில் இந்த மாடலின் எண்ணிக்கை குறைவாகவே விற்பனைக்கு வரும் என எதிர்பார்க்கப்படுகிறது.