பல்சர் 150 விற்பனையை திடீரென நிறுத்திய பஜாஜ்?

இந்திய மோட்டார்சைக்கிள் சந்தையில் முன்னணி நிறுவனம் என்ற பெருமையை எட்ட பல்சர் 150 மற்றும் பல்சர் 180 மாடல்கள் பஜாஜ் ஆட்டோ நிறுவனத்திற்கு பெரும் பங்கு வகித்துள்ளன. ஸ்போர்ட் ப்ரோஃபைல் மற்றும் சக்திவாய்ந்த செயல்திறன் காரணமாக இந்த மாடல்கள் விற்பனையில் நல்ல வரவேற்பை பெற்றன. கடந்த ஆண்டுகளில் பல்சர் சீரிஸ் அந்நிறுவனத்தின் ஒட்டுமொத்த விற்பனையில் கணிசமான பங்குகளை பெற்று இருக்கிறது.

கடந்த இரு தசாப்தங்களுக்கும் மேலாக பஜாஜ் நிறுவனம் விற்பனை செய்து வந்த பல்சர் 150 மாடலை இந்திய சந்தையில் நிறுத்திவிட்டது. இந்தியாவில் பஜாஜ் பல்சர் 150 விற்பனை நிறுத்தப்பட்ட போதிலும், இதற்கு மாற்றாக புதிய பல்சர் P150 மாடல் விற்பனை செய்யப்படுகிறது. பல்சர் சீரிசை மாற்றியமைக்கும் பஜாஜ் நிறுவன திட்டத்தின் கீழ் இந்த நடவடிக்கை எடுக்கப்பட்டுள்ளது.

முன்னதாக இந்த ஆண்டு ஆகஸ்ட் மாத வாக்கில் பல்சர் 180 மாடலின் விற்பனை இந்தியாவில் நிறுத்தப்பட்டது. இதே போன்று பல்சர் 220 உற்பத்தி கடந்த ஆண்டு நிறுத்தப்பட்டு விட்டது. 1980-90களில் பஜாஜ் நிறுவனம் ஸ்கூட்டர் சந்தையில் ஆதிக்கம் செலுத்தி வந்தது. அப்போது சந்தையில் 100சிசி கம்யுட்டர் ரக மாடல்கள் நல்ல வரவேற்பை பெற துவங்கின. இவை ஸ்கூட்டர்களை விட அதிக திறன் மற்றும் மைலேஜ் வழங்கின.

இதன் காரணமாக மோட்டார்சைக்கிள் பிரிவில் கவனம் செலுத்த பஜாஜ் திட்டமிட்டது. இதன் காரணமாக வெளியிடப்பட்டது தான் பல்சர் 150 மற்றும் பல்சர் 180 மாடல்கள். அசத்தலான தோற்றம் மற்றும் அதிரடியான செயல்திறன் காரணமாக பல்சர் ட்வின் மாடல்கள் இந்திய சந்தையில் நல்ல வரவேற்பை பெற்றன.

பல்சர் 150 மாடலுக்கு மாற்றாக அறிமுகம் செய்யப்பட்ட பல்சர் P150 மாடல் முற்றிலும் புது டிசைன், மெல்லிய ஹெட்லேம்ப், ஸ்கல்ப்ட் செய்யப்பட்ட ஃபியூவல் டேன்க், ஸ்லிம் வெயிஸ்ட்லைன், அண்டர்பெல்லி எக்சாஸ்ட், க்ரிஸ்டலைன் எல்இடி டெயில் லேம்ப் உள்ளிட்ட அம்சங்களை கொண்டிருக்கிறது. இந்த மாடல் சிங்கில் டோன் மற்றும் டூயல் டோன் ஆப்ஷன்களில் கிடைக்கிறது.