ஆட்டோமொபைல்
நவம்பர் மாதத்தில் ஃபோர்ஸ் மோட்டார்ஸ் விற்பனை 42 சதவீதம் உயர்வு
2019 நவம்பர் மாதத்தில் ஃபோர்ஸ் மோட்டார்ஸ் நிறுவனத்தின் வாகனங்கள் விற்பனை 42 சதவீதம் உயர்ந்து இருக்கிறது.
பன்முக பயன்பாட்டு வாகனங்கள், டிராக்டர், பேருந்து மற்றும் வேன்கள் தயாரிப்பில் ஈடுபட்டு வரும் ஃபோர்ஸ் மோட்டார்ஸ் நிறுவனம், 2019 நவம்பர் மாதத்தில் மொத்தம் 2,112 வாகனங்களை விற்பனை செய்துள்ளது. கடந்த ஆண்டின் இதே மாதத்தில் ஃபோர்ஸ் மோட்டார்ஸ் மொத்தம் 1,489 வாகனங்களை விற்பனை செய்து இருந்தது.
அந்த வகையில் 2019 நவம்பர் மாதத்தில் ஃபோர்ஸ் நிறுவன விற்பனை 42 சதவீதம் அதிகரித்து இருக்கிறது. மேலும் ஏற்றுமதி (12-ல் இருந்து) 176-ஆக உயர்ந்துள்ளது. உள்நாட்டு விற்பனை (1,477-ல் இருந்து) 1,936-ஆக உயர்ந்து இருக்கிறது.
விற்பனை உயர்வு காரணமாக ஃபோர்ஸ் மோட்டார்ஸ் நிறுவனப் பங்கு 9.82 சதவீதம் உயர்ந்து இருக்கிறது. வர்த்தகத்தின் இடையே அதிகபட்சமாக ரூ.1,052.55-க்கும், குறைந்தபட்சமாக ரூ.1,015-க்கும் சென்றது. இறுதியில் ரூ.1,018.70-ல் நிலைகொண்டது. இது, முந்தைய நாள் இறுதி நிலவரத்துடன் ஒப்பிடும்போது 0.78 சதவீத இறக்கமாகும்.