நீங்கள் தேடியது "ஜூனியர் உலக குத்துச்சண்டை"

புதுடெல்லி:

ஜூனியர் உலக குத்துச்சண்டை சாம்பியன்ஷிப் போட்டி அர்மேனியாவின் யேரிவானில் 10 நாட்கள் நடந்தது. இதில் கடைசி நாளில் பெண்களுக்கான 48 கிலோ எடைப்பிரிவில் இந்தியாவின் பாயல் உள்நாட்டு வீராங்கனை பெட்ரோஸ்யன் ஹிஜினை 5-0 என்ற புள்ளி கணக்கில் துவம்சம் செய்து தங்கப்பதக்கத்தை தட்டி சென்றார்.

ஆசிய இளையோர் சாம்பியன்களான நிஷா (52 கிலோ), அகன்ஷா (70 கிலோ) ஆகிய இந்திய வீராங்கனைகளும் எதிர்பார்த்தபடியே தங்கப் பதக்கத்துக்கு முத்தமிட்டனர். நிஷா தஜிகிஸ்தானின் பரினோசையும், அகன்ஷா ரஷியாவின் எலிஜவிட்டாவையும் 5-0 என்ற கணக்கில் சாய்த்தனர். மற்ற இந்தியர்களான வினி (57 கிலோ), சிருஷ்டி (63 கிலோ), மேஹா (80 கிலோ), சஹில் (75 கிலோ), ஹேமந்த் (80 கிலோவுக்கு மேல்), ஜதின் (54 கிலோ) ஆகியோர் தங்களது இறுதி சுற்றில் தோற்று வெள்ளிப்பதக்கத்துடன் திருப்தி அடைந்தனர்.

மொத்தத்தில் இந்தியா 3 தங்கம், 9 வெள்ளி, 5 வெண்கலம் என்று 17 பதக்கத்துடன் 5-வது இடத்தை பிடித்தது. ரஷியா 7 தங்கம், 2 வெள்ளி 7 வெண்கலத்துடன் முதலிடத்தை பெற்றது.

பப்ளோ:

ஜூனியர் உலக குத்துச்சண்டை சாம்பியன்ஷிப் (19 வயதுக்கு உட்பட்டோர்) போட்டி அமெரிக்காவில் உள்ள பப்ளோ நகரில் நடந்து வருகிறது.

இதில் பெண்கள் 75 கிலோ எடைப்பிரிவின் இறுதி சுற்றில் இந்திய வீராங்கனை கிரிஷா வர்மா 5-0 என்ற கணக்கில் ஜெர்மனியின் சிமோன் லிரிகாவை தோற்கடித்து தங்கப்பதக்கத்தை வசப்படுத்தினார்.

மேலும் இந்திய வீராங்கனைகள் சன்சல் சவுத்ரி (48 கிலோ), அஞ்சலி குமாரி சிங் (57 கிலோ), வினி ( 60 கிலோ), அகன்ஷ் பலாஸ்வால் (70 கிலோ) ஆகியோர் தங்களது இறுதிப்போட்டியில் தோல்வி கண்டு வெள்ளிப்பதக்கத்துடன் திருப்தி கண்டனர்.

ஆண்களுக்கான 75 கிலோ எடைப்பிரிவில் இந்திய வீரர் ராகுல் குண்டு வெள்ளிப்பதக்கம் பெற்றார்.