லண்டன் :
விராட் கோலி தலைமையிலான இந்திய கிரிக்கெட் அணி இங்கிலாந்தில் சுற்றுப்பயணம் மேற்கொண்டு 5 போட்டிகள் கொண்ட டெஸ்ட் தொடரில் பங்கேற்றுள்ளது. இதில் முதல் இரு டெஸ்டுகளில் இங்கிலாந்தும், நாட்டிங்காமில் நடந்த 3–வது டெஸ்டில் 203 ரன்கள் வித்தியாசத்தில் இந்தியாவும் வெற்றி பெற்றன. இதனால் தொடரில் இங்கிலாந்து 2 - 1 என்ற கணக்கில் முன்னிலை வகிக்கிறது.
இந்நிலையில், சவுத்தாம்டனில் உள்ள ரோஸ் பவ்ல் ஸ்டேடியத்தில் இன்று தொடங்கிய நான்காவது டெஸ்ட் போட்டியில் இங்கிலாந்து அணி டாஸ் வெற்றி பெற்று முதலில் பேட்டிங் தேர்வு செய்தது. அந்த அணியில் குக் மற்றும் ஜென்னிங்ஸ் தொடக்க ஆட்டக்காரர்களாக களமிறங்கினர்.
ஆட்டத்தில் இரண்டாவது ஓவரை வீசிய பூம்ரா தனது முதல் ஓவரின் முதல் பந்தில் விக்கெட் வீழ்த்தி அசத்தினார். முதல் பந்திலேயே தொடக்க வீரரான ஜென்னிங்ஸ் ஆட்டமிழந்தார். இதைத்தொடர்ந்து, கேப்டன் ரூட்டை 4 ரன்களில் வெளியேற்றிய இஷாந்த் சர்மா, டெஸ்ட் போட்டிகளில் 250 விக்கெட்டுக்களை வீழ்த்திய 3-வது இந்திய வேகப்பந்து வீச்சாளர் எனும் சாதனையை படைத்தார். இதில், கபில் தேவ் மற்றும் ஜாகீர் கான் ஆகியோர் முதல் இரண்டு இடங்களில் உள்ளனர்.
இதைத்தொடர்ந்து பேய்ர்ஸ்டோ 6 ரன்கள் எடுத்திருந்த நிலையில் பும்ரா பந்தில் ஆட்டமிழந்தார். நிதானமாக விளையாடிய குக் 18வது ஓவரில் பாண்டியா வீசிய பந்தில் மூன்றாவது ஸ்லிப்பில் இருந்த கோலியிடம் கேட்ச் கொடுத்து 17 ரன்களில் ஆட்டமிழந்தார்.
ஆட்டத்தின் 26-வது ஓவரில் 21 ரன்கள் எடுத்திருந்த நிலையில் பட்லரும், 34-வது ஓவரில் 23 ரன்கள் எடுத்திருந்த ஸ்டோக்சும் ஷமியின் வேகத்துக்கு ஈடு கொடுக்க முடியாமல் ஆட்டமிழந்து பெவிலியன் திரும்பினர். இதனால், 86 ரன்களுக்குள் இங்கிலாந்து அணி 6 விக்கெட்டுக்களை இழந்து திணறியது
பின்னர் ஜோடி சேர்ந்த மொயின் அலி மற்றும் குர்ரன் ஜோடி சிறப்பான ஆட்டத்தை வெளிப்படுத்தினர். மொயின் அலி 40 ரன்கள் எடுத்திருந்த நிலையில் அஷ்வின் தனது சுழலில் அவரை வீழ்த்தினார். 7-வது விக்கெட்டுக்கு மொயின் அலியும், குர்ரனும் இணைந்து 81-ரன்கள் சேர்த்தனர்.
அடில் ரஷித் 6, பிராட் 17 என அடுத்தடுத்த விக்கெட்டுக்கள் சரிந்தாலும் மறுமுனையில் சாம் குர்ரன் நிலைத்து நின்று விளையாடினார், இந்திய பந்து வீச்சாளர்களுக்கு போக்கு காட்டிய அவர் இறுதியில் 78 ரன்கள் எடுத்திருந்த நிலையில் அஷ்வின் பந்தில் போல்டு ஆகி வெளியேறினார்.
கடைசியில் 76.4 ஓவர்கள் முடிவில் 246 ரன்கள் குவித்து இங்கிலாந்து அணி ஆல் அவுட் ஆனது. இந்திய அணி தரப்பில் பூம்ரா 3 விக்கெட்டுக்கள், ஷமி, இஷாந்த் சர்மா, அஷ்வின் ஆகியோர் தலா 2 விக்கெட்டுக்களையும், பாண்டியா ஒரு விக்கெட்டையும் வீழ்த்தினர் வீழ்த்தினர். #INDvsENG
