ராஜபாளையம்:
விருதுநகர் மாவட்டம், ராஜபாளையம் பெத்தையா பிள்ளை தெருவைச் சேர்ந்தவர் மாரியப்பன் (வயது 57). கொத்தனார் வேலை பார்த்து வருகிறார். இவரது மனைவி நாச்சியார் (45).
மாரியப்பன் நேற்று வேலை முடித்து வீட்டுக்கு வந்தார். அப்போது வீட்டில் சிலிண்டர் காலியானது தெரியவந்தது. இதையடுத்து அவர் வேறு சிலிண்டர் மாற்றினார்.
இரவு கணவன்-மனைவி இருவரும் உணவு சாப்பிட்டு விட்டு தூங்கச் சென்றனர். இந்த நிலையில் நள்ளிரவில் கியாஸ் கசியும் வாடை வந்தது. இதனை உணர்ந்த நாச்சியார் கணவரை எழுப்பி இதுபற்றி கூறினார்.
பின்னர் இருவரும் சமையல் அறைக்கு வந்தனர். அங்கு கியாஸ் கசிந்து இருப்பது தெரியவந்தது. உடனே மாரியப்பன் ரெகுலேட்டரை சரி செய்தார். பின்னர் மாரியப்பன் மின் விளக்கு சுவிட்சை போட்டார். அப்போது அறையில் ஏற்கனவே கியாஸ் பரவி இருந்ததால் தீ விபத்து ஏற்பட்டது.
இந்த விபத்தில் மாரியப்பன் மற்றும் நாச்சியார் பலத்த தீக்காயம் அடைந்தனர்.
இதற்கிடையே அவர்கள் அலறல் சத்தம் கேட்டு அக்கம், பக்கத்தினர் அங்கு விரைந்து வந்தனர். அவர்கள் காயத்துடன் கிடந்த கணவன்-மனைவியை மீட்டு சிகிச்சைக்காக ராஜபாளையம் அரசு ஆஸ்பத்திரிக்கு அனுப்பி வைத்தனர். அங்கு அவர்களுக்கு முதலுதவி சிகிச்சை அளிக்கப்பட்டது. பின்னர் மேல் சிகிச்சைக்காக இருவரும் சிவகாசி தீக்காய தடுப்பு பிரிவு ஆஸ்பத்திரிக்கு அனுப்பி வைக்கப்பட்டனர். இந்த சம்பவம் தொடர்பாக ராஜபாளையம் வடக்கு போலீஸ் சப்-இன்ஸ்பெக்டர் ரமேஷ் வழக்குப்பதிவு செய்து விசாரணை நடத்தி வருகின்றனர்.
