பாலியல் சர்ச்சையில் சிக்கிய பிரெட் கவனாக் அமெரிக்க சுப்ரீம் கோர்ட் நீதிபதியாக பதவி ஏற்றார்

வாஷிங்டன்:

அமெரிக்க சுப்ரீம் கோர்ட் நீதிபதி பதவிக்கு பிரபல வழக்கறிஞர் பிரெட் கவனாக் என்பவரை அந்நாட்டு ஜனாதிபதி டொனால்ட் டிரம்ப் பரிந்துரை செய்தார். ஆனால், பிரெட் கவனாக் மீது 3 பெண்கள் பாலியல் குற்றச்சாட்டு கூறினர்.

இதையடுத்து பாலியல் புகாருக்கு ஆளான பிரெட் கவனாக்-கை நீதிபதி பதவிக்கு தேர்வு செய்யக்கூடாது என அந்நாட்டில் பலத்த எதிர்ப்பு எழுந்தது. எனினும், அவரை நீதிபதியாக நியமிக்க ஆளும் குடியரசு கட்சி தீவிர முயற்சி மேற்கொண்டது.
 

இந்நிலையில், நேற்று கூடிய அமெரிக்காவின் செனட் சபையில் பிரெட் கவனாக்-குக்கு ஆதரவாக 50 ஓட்டுகள் கிடைத்தன.  இதை தொடர்ந்து, அமெரிக்க சுப்ரீம் கோர்ட்டின் 114-வது நீதிபதியாக பிரெட் கவனாக் இன்று பதவி ஏற்று கொண்டார்.

அவருக்கு ஓய்வுபெற்ற நீதிபதி அந்தோனி கென்னடி பதவி பிரமாணமும், அமெரிக்க சுப்ரீம் கோர்ட் தலைமை நீதிபதி ஜான் ராபர்ட்ஸ் காப்புறுதி பிரமாணமும் செய்து வைத்தனர்.

வாஷிங்டன் நகரில் உள்ள சுப்ரீம் கோர்ட் கருத்தரங்க மண்டபத்தில் பிரெட் கவனாக் பதவி ஏற்றுகொண்ட போது அவருக்கு எதிர்ப்பு தெரிவித்து கோர்ட்டின் அருகே நூற்றுக்கணக்கான மக்கள் ஆர்ப்பாட்டத்தில் ஈடுபட்டனர்.

இந்த ஆர்ப்பாட்டத்துக்கு எதிர்ப்பு தெரிவித்துள்ள அதிபர் டொனால்ட் டிரம்ப், இதைப்பற்றி ஊடகங்கள் பெரிய அளவில் செய்தியாக்க முயற்சிப்பதாக குற்றம்சாட்டியுள்ளார். #Kavanaughswornin #USSupremeCourt #USSupremeCourtJudge