தமிழக மீனவர்கள் 19 பேருக்கு 18-ந்தேதி வரை நீதிமன்ற காவல்

ராமேசுவரம்:

கச்சத்தீவு அருகே மீன் பிடிக்கும் தமிழக மீனவர்களையும், அவர்களது விசைப்படகுகளையும் இலங்கை கடற்படையினர் சிறைபிடிக்கும் சம்பவங்கள் தொடர்ச்சியாக நடந்து வருகின்றன.

இதனை தடுக்கவும், கச்சத்தீவு பகுதியில் தங்கு தடையின்றி மீன்பிடிக்கவும் மத்திய-மாநில அரசுகள் நடவடிக்கை எடுக்க வேண்டும் என்று தமிழக மீனவர்கள் தொடர்ந்து கோரிக்கை வைத்து வருகின்றனர். இருந்தபோதிலும் தமிழக மீனவர்கள் சிறைபிடிப்பு சம்பவம் தொடர்ந்து வருகிறது.

இந்தநிலையில் கடந்த மாதம் (மார்ச்) 29 மற்றும் 31-ந் தேதி, ஏப்ரல் 2-ந் தேதி ஆகிய நாட்களில் எல்லைதாண்டி மீன்பிடித்ததாக ராமேசுவரம் மற்றும் புதுக்கோட்டை பகுதியைச் சேர்ந்த 19 மீனவர்களை இலங்கை கடற்படை சிறைபிடித்தது.

அவர்கள் அனைவரும் கோர்ட்டில் ஆஜர்படுத்தப்பட்டு சிறையில் அடைக்கப்பட்டனர். அவர்களுக்கான நீதிமன்ற காவல் முடிவடைந்த நிலையில் இன்று மீண்டும் ஆஜர்படுத்தப்பட்டனர். அவர்களுக்கான நீதிமன்ற காவலை வருகிற 18-ந் தேதி வரை நீட்டித்து ஊர்க்காவல் துறை நீதிமன்றம் உத்தரவிட்டது.

இதையடுத்து தமிழக மீனவர்கள் 19 பேரும் மீண்டும் யாழ்ப்பாணம் சிறையில் அடைக்கப்பட்டனர்.