இந்திய கிரிக்கெட் அணி 4 ஆண்டுகளுக்கு பிறகு அயர்லாந்து செல்கிறது

இந்த மாதம் 26-ஆம் தேதி தொடங்கும் ஐபிஎல் தொடர் மே மாதம் 29 ஆம் தேதி வரை நடைபெறுகிறது. 

இதன் பிறகு இந்திய கிரிக்கெட் அணி தென் ஆப்பிரிக்க அணியுடன் 5 போட்டிகள் கொண்ட டி20 தொடரில் பங்கேற்கிறது. இந்த போட்டிகள் ஜூன் 9 முதல் ஜூன் 15 வரை நடைபெறுகின்றன.

இதன் பிறகு அயர்லாந்து நாட்டிற்கு செல்லும் இந்திய அணி, அந்நாட்டு அணியுடன் 2 டி20 போட்டிகளில் விளையாடுகிறது. இரு அணிகளுக்கும் இடையே ஜூன் 26 ஆம் தேதி முதல் டி20 போட்டி நடைபெறுகிறது.

2-வது டி20 போட்டி ஜூன் 28 ஆம் தேதி நடைபெறுகிறது. இந்த தகவலை அயர்லாந்து கிரிக்கெட் வாரியம்  தங்களது டுவிட்டர் பக்கத்தில் உறுதிசெய்துள்ளது.

இதற்கு முன், கடந்த 2018 ஆம் ஆண்டில்  இந்திய அணி, டி20 தொடருக்காக அயர்லாந்தில் சுற்றுப்பயணம் செய்தது குறிப்பிடத்தக்கது.