மல்யுத்த தகுதி சுற்றில் சாக்‌ஷி மாலிக்கை வீழ்த்தினார் சோனம் மாலிக்

இத்தாலி தலைநகர் ரோமில் வருகிற 15-ந்தேதி முதல் 18-ந் தேதி வரை நடைபெறும் முதலாவது ரேங்கிங் சீரிஸ் மற்றும் டெல்லியில் பிப்ரவரி 18-ந்தேதி முதல் 23-ந் தேதி வரை நடைபெறும் ஆசிய சாம்பியன்ஷிப் போட்டியில் பங்கேற்கும் இந்திய மல்யுத்த பெண்கள் அணி தேர்வுக்கான தகுதி சுற்று போட்டி லக்னோவில் நேற்று நடந்தது.

இதில் 62 கிலோ எடைப்பிரிவில் உலக கேடட் போட்டியில் 2 முறை சாம்பியனான 18 வயது சோனம் மாலிக், ரியோ ஒலிம்பிக் போட்டியில் வெண்கல பதக்கம் வென்ற சாக்‌ஷி மாலிக்கை சந்தித்தார்.

விறுவிறுப்பான இந்த போட்டியில் சோனம் மாலிக் 10-10 என்ற புள்ளி கணக்கில் சமநிலை வகித்தாலும், கடைசி புள்ளியை வென்றதன் மூலம் சாக்‌ஷி மாலிக்கை வீழ்த்தி இறுதி சுற்றுக்கு முன்னேறினார். இறுதி சுற்றில் சோனம் மாலிக் 4-1 என்ற புள்ளி கணக்கில் ராதிகாவை தோற்கடித்து இந்திய அணியில் இடம் பிடித்தார்.

57 கிலோ எடைப்பிரிவில் ஆசிய ஜூனியர் சாம்பியனான அன்சு மாலிக், 2018-ம் ஆண்டு உலக சாம்பியன்ஷிப் போட்டியில் வெண்கலப்பதக்கம் வென்ற பூஜா தண்டா மற்றும் மான்சியை வென்று இந்திய அணியில் தடம் பதித்தார்.

வினேஷ் போகத் (53 கிலோ), திவ்யா கக்ரன் (68 கிலோ), நிர்மலா தேவி (50 கிலோ), கிரண் கோதரா (76 கிலோ) ஆகியோரும் தங்கள் பிரிவில் வெற்றி பெற்று இந்திய அணிக்கு தேர்வானார்கள்.