அஸ்வின் சாதனையை முறியடிப்பதில் சாஹல், பும்ரா இடையே போட்டி

இலங்கை கிரிக்கெட் அணி மூன்று 20 ஓவர் போட்டிகளில் விளையாடுவதற்காக இந்தியா வந்துள்ளது. இந்தியா - இலங்கை அணிகள் மோதும் முதல் 20 ஓவர் ஆட்டம் அசாம் மாநிலம் கவுகாத்தியில் இன்று இரவு 7 மணிக்கு நடக்கிறது. ஸ்டார் ஸ்போர்ட்ஸ் டெலிவிசனில் இந்த போட்டி நேரடியாக ஒளிபரப்பு செய்யப்படு கிறது.

விராட் கோலி தலைமையிலான இந்திய அணி வெற்றியுடன் கணக்கை தொடங்கும் ஆர்வத்தில் உள்ளது. இந்தியா கடைசியாக விளையாடிய 2 தொடர்களையும் கைப்பற்றி இருந்தது.

வங்காளதேசத்துக்கு எதிராக 2-1 என்ற கணக்கிலும், வெஸ்ட் இண்டீஸ்க்கு எதிராக 2-1 என்ற கணக்கிலும் வென்று இருந்தது. இதேபோல இலங்கைக்கு எதிரான தொடரை கைப்பற்றி ஹாட்ரிக் சாதனை நிகழ்த்துமா என்று எதிர் பார்க்கப்படுகிறது.

அதேநேரத்தில் மலிங்கா தலைமையிலான இலங்கை அணி இந்தியாவுக்கு எல்லா வகையிலும் சவால் கொடுத்து விளையாடும். இதனால் இன்றைய ஆட்டம் விறுவிறுப்பாக இருக்கும்.

வெஸ்ட் இண்டீஸ் தொடரில் விளையாடிய ரோகித் சர்மா, முகமது ‌ஷமி, புவனேஷ்வர் குமார், தீபக் சாஹர் ஆகியோர் விளையாடவில்லை. அவர்களுக்குரிய இடத்தில் தவான், பும்ரா இடம்பெற்றுள்ளனர்.

20 ஓவர் போட்டியில் அதிக விக்கெட் கைப்பற்றிய வீரராக அஸ்வின் உள்ளார். அவர் 46 ஆட்டத்தில் 52 விக்கெட் எடுத்துள்ளார். சமீபத்தில் யசுவேந்திர சாஹல் அவரது சாதனையை சமன் செய்தார். இன்றைய ஆட்டத்தில் ஒரு விக்கெட் கைப்பற்றினால் அவர் அஸ்வின் சாதனையை முறியடிப்பார்.

இதேபோல பும்ராவும் அவரது சாதனையை முறியடிக்க வாய்ப்பு உள்ளது. பும்ரா 42 ஆட்டத்தில் 51 விக்கெட் எடுத்துள்ளார். இன்றைய போட்டியில் பும்ரா, சாஹல் விக்கெட் கைப்பற்றுவதை பொறுத்து அதிக விக்கெட் வீழ்த்தும் இந்திய வீரர் யார்? என்பது தெரியவரும்.

இதேபோல் 20 ஓவர் ஆட்டத்தில் அதிக ரன் எடுத்த சர்வதேச வீரர்களில் விராட் கோலியும், ரோகித் சர்மாவும் முதல் இடத்தில் உள்ளனர். இருவரும் தலா 2633 எடுத்துள்ளனர். கோலி 70 இன்னிங்சிலும், ரோகித் சர்மா 96 இன்னிங்சிலும் இந்த ரன்னை எடுத்துள்ளனர்.

ரோகித் சர்மாவுக்கு ஓய்வு அளிக்கப்பட்டுள்ளதால் இலங்கை தொடரில் ஆட வில்லை. இதனால் விராட் கோலி இந்த தொடரில் ரன்களை எடுத்து முன்னிலை பெறுவார்.