எத்தனை நாள் தான் ஹீரோ பின்னாலேயே ஹீரோயின்கள் சுற்றுவது - பிரியாமணி

பருத்தி வீரன் உள்ளிட்ட படங்கள் மூலம் தனது திறமையை நிரூபித்த பிரியாமணி திருமணத்துக்கு பின் தமிழில் நடிக்காமல் இருந்தார். இப்போது பேமிலிமேன் என்ற இணைய தொடரில் நடித்துள்ளார். இதையொட்டி அவர் அளித்த பேட்டி:- 

இணைய தொடரில் நடித்த அனுபவம்?

மிகவும் நன்றாக இருந்தது. அமேசான் போன்ற ஒரு தளத்தில் ரிலீசாகும் தொடர் என்பதால் நல்ல வாய்ப்பை இழக்க விரும்பவில்லை. எனவே உடனே ஒப்புக்கொண்டேன். நடுத்தர குடும்பங்கள் தங்களை இந்த தொடருடன் எளிதில் பிணைத்துக்கொள்வார்கள். ஒரு நடுத்தர குடும்பத்து தலைவியாக நடித்துள்ளேன். 

தமிழ் சினிமாவில் எப்போது பார்க்கலாம்?

தமிழிலும் நிறைய வாய்ப்புகள் வருகின்றன. நல்ல கதையாகவும் கதாபாத்திரமாகவும் இருக்கவேண்டும் என்ற எனது எதிர்பார்ப்பே இந்த காத்திருப்புக்கு காரணம்.

சமீபகாலமாக இணைய தொடர் அதிகமாகி வருகிறதே?

ஆமாம். நல்ல விஷயம் தான். இதற்கான எதிர்காலம் சிறப்பாக இருக்கும். எல்லாமே டிஜிட்டலாகி வருகிறது. 

சென்சார் இல்லாததும் ஒரு காரணமா?

இணைய தொடருக்கு சென்சார் இல்லாததால் வித்தியாசமான கதைகள் வருகின்றன. சினிமாவில் சொல்ல தயங்கும் விஷயங்களை இங்கே சொல்ல முடிகிறது. நான் நடித்துள்ள இந்த தொடரில் ஆபாசம் இருக்காது. குடும்பத்துடன் பார்க்க கூடியதாக இருக்கும். இதுபோன்ற தொடர்கள் இணையத்தில் வர தொடங்கினால் இணைய தொடர்களுக்கு வரவேற்பு அதிகரிக்கும். 

அறிமுகமாகும் நடிகைகள் எல்லாம் உங்களை தான் ரோல்மாடல் என்கிறார்கள்... தமிழை மறந்துவிட்டீர்களா?

அப்படி யாரும் சொல்கிறார்களா என்ன? இதை கேட்கும்போதே மகிழ்ச்சியாக இருக்கிறது. தமிழ் ரசிகர்களை மறக்க மாட்டேன். என் சினிமா வாழ்க்கையே தமிழ்நாட்டில் தான் தொடங்கியது. தமிழையும் தமிழ் ரசிகர்களையும் என்றுமே மறக்க மாட்டேன். சரியான வாய்ப்புகள் அமைய வேண்டும். அமைந்தால் நிச்சயம் பண்ணுவேன்.

கதாநாயகிக்கு முக்கியத்துவம் தரும் படங்கள் அதிகரித்துள்ளதே?

நல்ல மாற்றம். எத்தனை நாள் தான் ஹீரோ பின்னாலேயே ஹீரோயின்கள் சுற்றுவது? ஹீரோயின்களின் திறமையை காட்ட அது போன்ற படங்கள் நிறைய வரவேண்டும்.