சினிமா
ஜெயம் ரவியுடன் மீண்டும் இணைந்த யுவன்
அகமத் இயக்கத்தில் ஜெயம் ரவி நடிக்கும் புதிய படத்தின் இசையமைப்பாளராக யுவன் சங்கர் ராஜா ஒப்பந்தமாகியுள்ளதாக தகவல் வெளியாகியுள்ளது.
கோமாளி படத்திற்கு பிறகு தனது 25ஆவது படத்தில் ஜெயம் ரவி லக்ஷ்மன் இயக்கத்தில் நடிக்கிறார். இந்த படத்தைத் தொடர்ந்து என்றென்றும் புன்னகை, மனிதன் ஆகிய படங்களை இயக்கிய அகமத் இயக்கத்தில் தனது 26ஆவது படத்தில் ஜெயம் ரவி நடிக்கிறார். டாப்சி கதாநாயகியாக நடிக்கும் இப்படத்தின் படப்பிடிப்பு அசர்பைஜானில் நடைபெற்று வருகிறது. ஆக்ஷன் திரில்லர் பாணியில் உருவாகும் இந்தப் படத்தில் ஈரானிய நடிகை எல்நாஸ் நொரோஷியும் முக்கிய கதாபாத்திரத்தில் நடிக்கிறார்.
இந்த படத்திற்கு ஏ.ஆர்.ரகுமான் இசையமைக்க உள்ளதாக தகவல் வெளியானது. இந்நிலையில், இப்படத்தின் இசையமைப்பாளராக யுவன் சங்கர் ராஜா ஒப்பந்தமாகியுள்ளதாக கூறப்படுகிறது. இவர் ஏற்கனவே ஜெயம் ரவி நடித்த தாஸ், தீபாவளி, ஆதிபகவன் ஆகிய படங்களுக்கு இசையமைத்தது குறிப்பிடத்தக்கது.