ஜான்வி காதலில் விழுந்தாரா? தந்தை போனி கபூர் விளக்கம்

தமிழில் முன்னணி நடிகையாக இருந்த ஸ்ரீதேவி இந்தியிலும் முன்னணி நடிகையாக விளங்கினார். தயாரிப்பாளர் போனி கபூரை திருமணம் செய்துகொண்ட அவருக்கு ஜான்வி, குஷி என 2 மகள்கள். கடந்த ஆண்டு துபாயில் நடந்த விபத்தில் ஸ்ரீதேவி காலமானார்.

போனி கபூர் தம்பதியின் மூத்த மகள் ஜான்வி தடக் படம் மூலம் நடிகையானார். அந்த படத்தின் கதாநாயகனான இஷான் கட்டாரும் (நடிகர் சாகித் கபூரின் தம்பி), ஜான்வியும் காதலிப்பதாக செய்தி பரவியது. இஷான், ஜான்வி காதலுக்கு போனி கபூர் சம்மதித்து விட்டதாகவும் தகவல்கள் வெளியாகின.

இது குறித்து போனி கபூர் விளக்கம் அளித்துள்ளார். அவர் கூறியிருப்பதாவது: இஷானும், ஜான்வியும் சேர்ந்து ஒரு படத்தில் நடித்தார்கள். அதனால் அவர்கள் நண்பர்களாகி இருக்கக்கூடும். நான் என் மகளையும், அவர் இஷானுடன் நட்பில் இருப்பதையும் மதிக்கிறேன்’ என்று தெரிவித்துள்ளார்.

இஷான் கட்டார் அடிக்கடி ஜான்வியின் வீட்டிற்கு செல்கிறார் என்றும், அதை போனி கபூர் கண்டுகொள்வது இல்லை என்றும் கூறப்பட்டது. இது குறித்து போனிகபூருக்கு நெருக்கமான ஒருவர் கூறியதாவது:-

‘தடக் படம் ரிலீசான பிறகு இஷான் ஒரு முறை கூட ஜான்வியின் வீட்டிற்கு வந்தது இல்லை. அவர்களுக்கு இடையே நட்பை தாண்டி எதுவும் இல்லை’ என்றார்.