1533 ரன்கள், 24 விக்கெட்டுக்கள்: டிராவில் முடிந்த சிட்டகாங் டெஸ்ட்

வங்காள தேசம் - இலங்கை இடையிலான முதல் டெஸ்ட் சிட்டகாங்கில் நடைபெற்றது. டாஸ் வென்று முதலில் பேட்டிங் தேர்வு செய்த வங்காள தேசம் முதல் இன்னிங்சில் மொமினுல் ஹக்யூ (176) சதத்தால் 513 ரன்கள் குவித்தது. இலங்கை அணி சார்பில் லக்மல், ஹெராத் தலா மூன்று விக்கெட்டுக்கள் வீழ்த்தினார்கள்.

பின்னர் முதல் இன்னிங்சை தொடங்கிய இலங்கை அணி குசால் மெண்டிஸ் (196), தனஞ்ஜெயா டி சில்வா (173), ரோசன் சில்வா (109) ஆகியோரின் சதத்தால் வங்காள தேசத்திற்கு பதிலடி கொடுத்தது. இலங்கை முதல் இன்னிங்சில் 9 விக்கெட் இழப்பிற்கு 713 ரன்கள் குவித்து டிக்ளேர் செய்தது. தைஜூல் இஸ்லாம் 4 விக்கெட்டும், மெஹிதி ஹாசன் மிராஸ் 3 விக்கெட்டும் வீழ்த்தினார்கள்.

சரியாக 200 ரன்கள் பின்தங்கிய நிலையில் வங்காள தேசம் அணி 2-வது இன்னிங்சை தொடங்கியது. தமிம் இக்பால் (41), இம்ருல் கெய்ஸ் (19), முஷ்பிகுர் ரஹிம் (2) சொற்ப ரன்களில் ஆட்டமிழக்க வங்காள தேசம் நேற்றைய 4-வது நாள் ஆட்ட முடிவில் 81 ரன்கள் எடுப்பதற்குள் 3 விக்கெட்டுக்களை இழந்து நெருக்கடிக்குள் உள்ளாகியிருந்தது. மொமினுல் ஹக்யூ 18 ரன்கள் எடுத்த நிலையில் களத்தில் இருந்தார்.

இன்று கடைசி நாள் ஆட்டம் தொடங்கியது. மொமினுல் ஹக்யூடன் விக்கெட் கீப்பர் லித்தோன் தாஸ் ஜோடி சேர்நதார். இன்னிங்ஸ் தோல்வியை தவிர்க்கவே வங்காள தேசத்திற்கு 119 ரன்கள் தேவைப்பட்டது. இருவரும் பொறுப்பை உணர்ந்து சிறப்பான ஆட்டத்தை வெளிப்படுத்தினார்கள். ஐந்தாவது நாள் ஆடுகளம் சுழற்பந்து வீச்சுக்கு சாதகமாக இருந்த போதிலும், அதனை எதிர்கொண்டு ரன்கள் சேர்த்தனர்.

கடைசி நாள் மதிய உணவு இடைவேளை வரை இருவரும் விக்கெட் இழக்காமல் விளையாடினார்கள். வங்காள தேசம் 3 விக்கெட் இழப்பிற்கு 187 ரன்கள் எடுத்திருந்தது. மொமினுல் ஹக்யூ 70 ரன்னுடனும், லித்தோன் தாஸ் 47 ரன்னுடனும் களத்தில் இருந்தனர். மதிய உணவு இடைவேளை முடிந்து ஆட்டம் தொடங்கியதும் லித்தோன் தாஸ் அரைசதம் அடித்தார். வங்காள தேசம் 200 ரன்னைத் தொட்டு ஸ்கோரை லெவன் செய்தது.



சிறப்பாக விளையாடிய மொமினுல் ஹக்யூ 154 பந்தில் 5 பவுண்டரி, 2 சிக்சருடன் சதம் அடித்தார். வங்காள தேச அணியின் ஸ்கோர் 261 ரன்னாக இருக்கும்போது இந்த ஜோடி பிரிந்தது. மொமினுல் ஹக்யூ 105 ரன்கள் எடுத்த நிலையில் ஆட்டமிழந்தார். மறுமுனையில் விளையாடிய லித்தோன் தாஸ் 94 ரன்களில் ஆட்டமிழந்து சதம் அடிக்கும் வாய்ப்பு இழந்தார்.

4-வது விக்கெட்டுக்கு இந்த ஜோடி 185 ரன்கள் குவித்தது. இதனால் வங்காள தேச அணி தோல்வியில் இருந்து தப்பியது. அத்துடன் போட்டி டிராவை நோக்கிச் சென்றது. 6-வது விக்கெட்டுக்கு கேப்டன் மெஹ்முதுல்லா உடன் மொசாடெக் ஹொசைன் ஜோடி சேர்ந்தார். கடைசி நாள் தேனீர் இடைவேளை வரை வங்காள தேசம் 5 விக்கெட் இழப்பிற்கு 281 ரன்கள் எடுத்திருந்தது. மெஹ்முதுல்லா 12 ரன்னுடனும், மொசாடெக் ரன்ஏதும் எடுக்காமலும் களத்தில் இருந்தனர்.

தேனீர் இடைவேளை முடிந்த ஆட்டம் தொடங்கியது. மெஹ்முதுல்லா, மொசாடெக் விக்கெட்டை இழக்காமல் விளையாடினார்கள். வங்காள தேசம் சரியான 100 ஓவரில் 5 விக்கெட் இழப்பிற்கு 307 ரன்கள் எடுத்திருக்கும்போது இரு அணி கேப்டன்களும் போட்டியை முடித்துக் கொள்ள முடிவு செய்தனர். இதனால் ஆட்டம் வெற்றி தோல்வியின்றி டிராவில் முடிந்தது.

இந்த டெஸ்டில் 1533 ரன்கள் அடிக்கப்பட்டுள்ளன. ஆனால் 24 விக்கெட்டுக்கள் மட்டுமே வீழ்ந்துள்ளது. இரு அணிகளுக்கு இடையிலான 2-வது மற்றும் கடைசி டெஸ்ட் 8-ந்தேதி டாக்காவில் நடக்கிறது.