தாமதமாகும் படப்பிடிப்பு- தள்ளிப்போகும் அஜித் பட ரிலீஸ் தேதி

அஜித் 'வலிமை' படத்திற்குப் பிறகு தற்போது எச்.வினோத் இயக்கத்தில் போனி கபூர் தயாரிப்பில் உருவாகி வரும் 'ஏ.கே. 61' படத்தில் நடித்து வருகிறார். ஹைதராபாத், விசாகப்பட்டினம், சென்னை, புனே என பல்வேறு இடங்களில் இந்தப் படத்தின் படப்பிடிப்பு விறுவிறுப்பாக நடைபெற்று வருகிறது.

இதில் மஞ்சுவாரியர், சமுத்திரக்கனி, ஜி.எம்.சுந்தர், மகாநதி சங்கர், ஜான் கொக்கன் ஆகியோர் முக்கிய கதாப்பாத்திரங்களில் நடிக்கின்றனர். இந்த படத்தின் இடைவெளியில் ஐரோப்பிய நாடுகளுக்கு சுற்றுலா சென்ற அஜித் சென்னை திரும்பியதும் மீண்டும் படப்பிடிப்பில் கலந்து கொண்டார்.

சமீபத்தில் விசாகப்பட்டினத்தில் நடைபெறும் படப்பிடிப்பில் கலந்துகொள்ள நடிகர் அஜித் சென்னை விமான நிலையத்தில் பேருந்தில் சென்றபோது எடுக்கப்பட்ட புகைப்படங்ளும் வைரலாகின. சில தினங்களுக்கு முன்பு நடிகர் அஜித் இமயமலையைச் சுற்றியுள்ள இடங்களுக்கு பைக் பயணம் மேற்கொண்டுள்ளதாகவும் ஒரு வாரம் இந்த இமயமலை பைக் பயணத்தை முடித்துக்கொண்டு திரும்பும் அஜித் ஏ.கே. 61 படத்தில் பணியில் ஈடுபடுவார் என்று தகவல் வெளியானது.

இந்நிலையில் மீண்டும் படப்பிடிப்புக்காக அஜித் வெளிநாடு கிளம்பவுள்ளதாக கூறப்படுகிறது. அடுத்த கட்டமாக பாங்காக்கில் படப்பிடிப்பை நடத்த திட்டமிட்டு உள்ளதாகவும் இதற்காக விரைவில் அஜித்குமார் உள்ளிட்ட படக்குழுவினர் பாங்காக் செல்ல இருப்பதாகவும் தகவல் வெளியாகி உள்ளது. அங்கு 3 வாரங்கள் தங்கி இருந்து முழு படப்பிடிப்பையும் முடித்து விட்டு சென்னை திரும்ப இருப்பதாக கூறப்படுகிறது.

இப்படத்தை தீபாவளி பண்டிகையில் திரைக்கு கொண்டு வர திட்டமிட்டு இருந்த நிலையில் படப்பிடிப்பில் தாமதம் ஏற்பட்டு உள்ளதால் பொங்கல் பண்டிகையில் வெளியிட படக்குழுவினர் ஆலோசித்து வருவதாக சினிமா வட்டாரங்கள் தெரிவிக்கின்றன.