தமிழகத்தில் த.வெ.க. ஆட்சி அமைந்த பிறகு தி.மு.க. முன்னாள் அமைச்சர்கள் மீதான ஊழல் மற்றும் முறைகேடுகள் தொடர்பான குற்றச்சாட்டுகள் குறித்து போலீசார் தொடர்ந்து விசாரணை நடத்தி வருகிறார்கள்.
முன்னாள் அமைச்சர்களான எ.வ.வேலு, செந்தில் பாலாஜி, கே.என்.நேரு ஆகியோர் வீடுகளில் லஞ்ச ஒழிப்பு போலீசார் ஏற்கனவே சோதனை நடத்தி உள்ளனர்.
இந்த நிலையில் முன்னாள் பள்ளி கல்வித்துறை அமைச்சரான அன்பில் மகேஷ் பொய்யாமொழியின் சென்னை, திருச்சி வீடுகள் உள்ளிட்ட இடங்களில் இன்று போலீசார் அதிரடி சோதனையில் ஈடுபட்டனர்.
தனியார் பள்ளிகளுக்கான அங்கீகாரம் மற்றும் அதனை புதுப்பித்தல், நிரந்தர அனுமதி மற்றும் தரம் உயர்த்துவதற்கான சான்றிதழ்களை தமிழக அரசிடம் இருந்து வாங்கு வதற்காக பல லட்சம் ரூபாய் முறைகேடாக வசூலிக்கப்பட்டதாக குற்றச்சாட்டு எழுந்தது.
தமிழ்நாடு தனியார் பள்ளிகள் சங்கத்தின் நிறுவன தலைவரும், தி.மு.க. பிரமுகமான புதுக்கோட்டையை சேர்ந்த பி.டி. அரசகுமார் இதில் இடைத்தரகராக இருந்து பணம் வசூலித்ததாக அளிக்கப்பட்ட புகாரின் பேரில் சென்னை மத்திய குற்றப்பிரிவு போலீசார் விசாரணை நடத்தினார்கள்.
இது தொடர்பாக வழக்குப்பதிவு செய்யப்பட்டு பி.டி.அரசகுமார் மீது நடவடிக்கையும் எடுக்கப்பட்டது. கடந்த ஜூன் மாதம் பி.டி.அரசகுமார் கைது செய்யப்பட்டு சிறையில் அடைக்கப்பட்டார்.
இது தொடர்பாக சென்னை மாநகர போலீசார் வெளியிட்ட அறிவிப்பில் பி.டி.அரசகுமாரிடம் பணம் கொடுத்து ஏமாந்தவர்கள் புகார் அளிக்கலாம் என்று தெரிவித்தனர்.
அந்த வகையில் ரூ.100 கோடி அளவுக்கு தனியார் பள்ளிகளிடம் இருந்து முறைகேடாக பணம் வசூலிக்கப்பட்டதும் இந்த விவகாரத்தில் மிகப்பெரிய அளவில் ஊழல் நடைபெற்று இருப்பதும் வெளிச்சத்துக்கு வந்தது.
தமிழ்நாடு தனியார் பள்ளிகள் சங்கங்களின் கூட்டமைப்பு செயலாளர் இளங்கோவன் அளித்த புகாரின் அடிப்படையில் தான் இந்த நடவடிக்கைகள் மேற்கொள்ளப்பட்டு இருந்தன.
இது தொடர்பாக பி.டி.அரசகுமாருக்கு உடந்தையாக இருந்ததாக அவரது கூட்டாளிகளாக ஆரோக்கியராஜ், சுரேஷ் ஆகியோரும் கைதானார்கள்.
இந்த வழக்கில் அடுத்தக்கட்ட நடவடிக்கையாகவே அன்பில் மகேஷ் தொடர்புடைய 6 இடங்களில் இன்று போலீசார் அதிரடி சோதனையை நடத்தி இருக்கிறார்கள்.
பி.டி.அரசகுமாரிடம் நடத்தப்பட்ட விசாரணையில் ஏராளமான தனியார் பள்ளி நிர்வாகிகளிடம் அங்கீகாரம் தரம் உயர்த்துதல் உள்ளிட்டவற்றுக்காக லட்சக்கணக்கில் முறைகேடாக பணம் வசூலிக்கப்பட்டது கண்டு பிடிக்கப்பட்டது. இதைத் தொடர்ந்து அரசகுமார் மீது குண்டர் சட்டமும் பாய்ந்தது.
போலீசாரிடம் அரசகுமார் அளித்த வாக்குமூலத்தின் அடிப்படையிலேயே அன்பில் மகேஷ் தொடர்புடைய இடங்களில் சோதனை நடத்தப்பட்டு உள்ளதாக போலீஸ் தரப்பில் தெரிவிக்கப்பட்டு உள்ளது.
இதன்படியே இன்று சென்னை கிரீன்வேஸ் சாலையில் உள்ள அன்பில் மகேசின் வீடு, ஆழ்வார்பேட்டையில் உள்ள உதவியாளர் வாலாடி கார்த்திக் வீடு ஆகிய இடங்களில் சோதனை நடத்தப்பட்டு உள்ளது.
திருச்சி தென்னூர் அண்ணா நகரில் உள்ள முன்னாள் அமைச்சர் அன்பில் மகேஷ் பொய்யாமொழி வீடு மற்றும் இன்னொரு இடத்தில் சோதனை நடத்தப்பட்டது.
இது தொடர்பாக சென்னை போலீசார் வெளியிட்டுள்ள அறிவிப்பில், “சென்னை மற்றும் திருச்சியில் 6 இடங்களில் ஒரே நேரத்தில் சோதனைகள் மேற்கொள்ளப்பட்டு வருவதாக தெரிவிக்கப்பட்டு உள்ளது.
காலை 7 மணியளவில் சென்னை மத்திய குற்றப்பிரிவு போலீசார் 16 பேர் திருச்சி வந்தனர். பின்னர் நேராக தென்னூர் அண்ணா நகரில் உள்ள அன்பில் மகேஷ் பொய்யாமொழி வீட்டுக்கு சென்று அதிரடி சோதனையில் ஈடுபட்டனர். சோதனையின் போது அன்பில் மகேஷ் பொய்யாமொழி வீட்டில் இருந்தார்.
அவரிடம் பி.டி. அரசகுமார் கொடுத்த வாக்குமூலத்தின் அடிப்படையில் கேள்விகள் கேட்கப்பட்டு விசாரணை நடத்தப்பட்டது. மேலும் முறைகேடு ஆதாரங்களை திரட்டும் வகையில் வீடு முழுவதும் சல்லடை போட்டு சோதனை நடத்தினர்.
அந்த வகையில் அன்பில் மகேஷ் மனைவியிடம் விசாரணை நடத்த திட்டமிட்டு மகளிர் போலீசாரும் வந்தனர். ஆனால் அவர் சென்னையில் இருந்ததால் ஏமாற்றம் அடைந்தனர். இந்த சோதனை தி.மு.க. வட்டாரத்தில் பெரும் அதிர்ச்சியை ஏற்படுத்தியுள்ளது.
சோதனை பற்றிய தகவல் அறிந்த அன்பில் மகேஷ் ஆதரவாளர்கள் மற்றும் தி.மு.க.வினர் அவரது வீட்டு முன்பு திரண்டனர்.
அதை தொடர்ந்து உள்ளூர் போலீசார் அங்கு பாதுகாப்பு பணியில் ஈடுபடுத்தப்பட்டுள்ளனர். முன்னாள் பள்ளிக்கல்வித்துறை அமைச்சர் அன்பில் மகேஷ் பொய்யாமொழி வீட்டில் போலீசார் சோதனை நடத்தி வருவது பரபரப்பை ஏற்படுத்தியுள்ளது.
