மானாமதுரை:
குடியுரிமைச் சட்டத்துக்கு எதிராக நாடு முழுவதும் பல்வேறு அமைப்பினர் மற்றும் அரசியல் கட்சிகள் சார்பில் போராட்டம் நடைபெற்று வருகிறது. இந்நிலையில் நடிகர் ரஜினிகாந்த் இன்று செய்தியாளர்களுக்கு அளித்த பேட்டியில்,
அரசியல் கட்சிகள் சுயலாபத்திற்காக தூண்டிவிடுகிறார்கள். குறிப்பாக மாணவர்கள் போராட்டத்தில் இறங்கும்போது தீர ஆராய்ந்து இறங்குங்கள்.
பிரிவினையின்போது செல்லாமல் இதுதான் எங்கள் ஜென்மபூமி என இங்கேயே வாழும் இஸ்லாமியர்களை எப்படி வெளியே அனுப்புவார்கள்? அதுபோல் ஏதாவது நடந்தால் அவர்களுக்காக முதல் ஆளாக நானே வந்து நிற்பேன்.
குடியுரிமைத் திருத்தச் சட்ட விவகாரத்தில் தேவையற்ற பீதி ஏற்படுத்தப்பட்டுள்ளது. இதனால் இஸ்லாமியர்களுக்கு எந்த பாதிப்பும் இல்லை என்று தெரிவித்தார்.
இதற்கு காங்கிரஸ் உள்ளிட்ட கட்சிகள் கடும் எதிர்ப்பு தெரிவித்துள்ளன. இது குறித்து மானாமதுரையில் கார்த்திக் சிதம்பரம் எம்.பி. செய்தியாளர்களிடம் கூறியதாவது:-
ரஜினி அவரது வெளிப்பாட்டை கூறியது நல்லது. ரஜினி பாஜகவின் ஆதரவாளர் என்பது வெளிப்படையாக தெரிகிறது. ரஜினிக்கு தனிக்கட்சி தேவையில்லை. அவர் பாஜகவில் இணைவது தான் நல்லது. பாஜகவின் பொம்மலாட்டத்துக்கு ரஜினி செவிசாய்க்கிறார். தமிழகம், தமிழக மக்களுக்கு விரோதமான கட்சி பாஜக.
இவ்வாறு அவர் கூறினார்.