புவனேசுவரம்:
சர்வதேச ஆக்கி சம்மேளனம் சார்பில் புரோ லீக் ஹாக்கி போட்டி பல்வேறு நாடுகளில் நடந்து வருகிறது. இதில் பங்கேற்றுள்ள முன்னணி 9 அணிகளும் தங்களுக்குள் தலா 2 முறை மோத வேண்டும். மன்பிரீத்சிங் தலைமையிலான இந்திய அணி தனது முதல் இரு ஆட்டங்களில் நெதர்லாந்தை தோற்கடித்தது. அடுத்த சுற்றில் உலக சாம்பியன் பெல்ஜியத்துக்கு எதிராக ஒன்றில் வெற்றியும், மற்றொன்றில் தோல்வியும் கண்டது.
இந்த நிலையில் இந்திய அணி தனது அடுத்த ஆட்டங்களில் முன்னாள் உலக சாம்பியனும், 2-ம் நிலை அணியுமான ஆஸ்திரேலியாவை இன்றும், நாளையும் புவனேசுவரத்தில் உள்ள கலிங்கா ஸ்டேடியத்தில் எதிர்கொள்கிறது. இந்தியாவுக்கு எதிராக கடைசியாக மோதிய 30 ஆட்டங்களில் 22-ல் ஆஸ்திரேலியா வெற்றி கண்டுள்ளது. 2016-ம் ஆண்டுக்கு பிறகு இந்தியாவிடம் தோற்றதில்லை. இருப்பினும் உலக சாம்பியனை வீழ்த்திய உத்வேகத்துடன் உள்ள இந்திய அணி உள்ளூர் ரசிகர்களின் ஆதரவுடன் ஆஸ்திரேலியாவுக்கு கடும் நெருக்கடி கொடுக்கும் என்று நம்பலாம். இரவு 7 மணிக்கு தொடங்கும் இந்த ஆட்டத்தை ஸ்டார் ஸ்போர்ட்ஸ்1 சேனல் நேரடி ஒளிபரப்பு செய்கிறது.