புதுடெல்லி:
பாஜக, காங்கிரஸ், இடதுசாரிகள் உள்ளிட்ட தேசிய கட்சிகள் கடந்த நிதியாண்டில் (2016-17) ரூ.20 ஆயிரத்திற்கும் அதிகமாக பெற்ற நன்கொடை குறித்த தகவல்களை ஜனநாயக மாற்றத்திற்கான அமைப்பு (ADR) வெளியிட்டுள்ளது. பாஜக ரூ.532.27 கோடிகள் பெற்று முதலிடத்தில் உள்ளது.
காங்கிரஸ் ரூ.41.90 கோடி, தேசியவாத காங்கிரஸ் ரூ.6.34 கோடி, சிபிஎம் ரூ.5.25 கோடி, திரினாமுல் காங்கிரஸ் ரூ.2.15 கோடி மற்றும் சிபிஐ ரூ.1.44 கோடி நன்கொடையாக பெற்றுள்ளன. மற்ற அனைத்து கட்சிகள் பெற்ற நன்கொடையை கூட்டினாலும், பாஜக பெற்ற நன்கொடை 9 மடங்கு அதிகமாக உள்ளது.
கடந்த 2015-16 நிதியாண்டை எடுத்துக்கொண்டால் பாஜக ரூ.76.85 கோடி நன்கொடையாக பெற்றிருந்தது. தற்போது, அக்கட்சிக்கான நன்கொடை 593 சதவிகிதம் அதிகரித்துள்ளது குறிப்பிடத்தக்கது. மற்றொரு தேசிய கட்சியான பகுஜன் சமாஜ் ரூ.20 ஆயிரத்திற்கு அதிகமாக யாரிடமும் நன்கொடை பெறவில்லை என்பதால் மொத்த நன்கொடை விபரங்கள் வெளியாகவில்லை.