இந்தியாவிலேயே முழுமையாக வடிவமைக்கப்பட்டு, அதன் காப்புரிமை மற்றும் அறிவுசார் சொத்துரிமைகளை இந்திய நிறுவனங்களே கொண்ட ஸ்மார்ட்போன்கள் அடுத்த 10 முதல் 14 மாதங்களுக்குள் சந்தைக்கு வரும் என்று மத்திய ரெயில்வே, மின்னணு மற்றும் தகவல் தொழில்நுட்பத் துறை அமைச்சர் அஸ்வினி வைஷ்ணவ் தெரிவித்துள்ளார்.
இந்தியாவில் மொபைல் உற்பத்தி மற்றும் உள்நாட்டு பிராண்டுகளை ஊக்குவிக்கும் வகையில் ரூ.62,500 கோடி நிதி ஒதுக்கீட்டில் "மொபைல் போன் தயாரிப்பு திட்டம்" முறைப்படி அறிவிக்கப்பட்டுள்ளது. இத்திட்டத்தின் கீழ் உள்நாட்டிலேயே ஆராய்ச்சி மற்றும் மேம்பாட்டுத் திறன்களைக் கொண்டு, சர்வதேச தரத்திற்கு இணையான ஸ்மார்ட்போன்களை வடிவமைக்கும் மூன்று முன்னணி இந்திய நிறுவனங்கள் அடையாளம் காணப்பட்டுள்ளன.
வேறு நிறுவனங்களின் வடிவமைப்புகளை அப்படியே நகலெடுக்கும் போலி தயாரிப்புகளுக்கு இத்திட்டத்தின் கீழ் எந்தவித ஊக்கத்தொகையும் வழங்கப்படாது என்று மத்திய அரசு தெளிவாகக் கூறியுள்ளது. இந்திய நிறுவனங்கள் தங்களது சொந்த பிராண்ட் பெயரிலும், சொந்த காப்புரிமை அடிப்படையிலும் மட்டுமே செல்போன்களை வடிவமைத்து வெளியிட வேண்டும் என்று நிபந்தனை விதிக்கப்பட்டுள்ளது.
தற்போது இந்தியாவில் பயன்படுத்தப்படும் ஸ்மார்ட்போன்களில் பெரும்பாலானவை உள்நாட்டில் அசெம்பிள் செய்யப்பட்டாலும், முழுமையான வடிவமைப்புத் தொழில்நுட்பம் வெளிநாடுகளிடமே உள்ளது. இப்புதிய திட்டத்தின் மூலம் இந்திய மொபைல் போன் உற்பத்தியின் மதிப்பு வரும் ஆண்டுகளில் ரூ.39 லட்சம் கோடியாக உயரும் என்றும், இதன் மூலம் சுமார் 60,000 பேருக்கு நேரடி வேலைவாய்ப்புகள் உருவாகும் என்றும் எதிர்பார்க்கப்படுகிறது.