திருமணத்தில் தங்கத்திற்கு பதில் நிலம்: தமிழகத்தில் புதிய கலாசாரம் பரவுகிறது

இந்த உரையாடல் ஏதோ ஒரு குடும்பத்தின் தனிப்பட்ட கதை அல்ல. தங்கம் விலை எட்டாக்கனியாக உயர்ந்து வரும் சூழலில், தமிழகத்தின் பல நடுத்தரக் குடும்பங்களில் இன்று ஒலிக்கத் தொடங்கியிருக்கும் புதிய எதார்த்தம் இது. பெண் பிள்ளைகளின் திருமணத்திற்காகத் தங்க நகைகளைச் சேர்த்து வைப்பதற்குப் பதிலாக, தங்களிடம் இருக்கும் நிலம், வீடு, காலி மனை போன்ற சொத்துகளை மகள்களின் பெயரில் எழுதிக் கொடுக்கும் புதிய கலாச்சாரம் தமிழகத்தில் வேகமாக பரவி வருகிறது.

உலகத் தங்கக் கவுன்சிலின் புள்ளிவிவரங்களின்படி, உலகிலேயே அதிக தங்கத்தை வாங்கும் நாடுகளில் இந்தியா முன்னணியில் உள்ளது. இந்தியாவின் மொத்த தங்க நுகர்வில் சுமார் 40 சதவீதம் தென்னிந்திய மாநிலங்களிலேயே நடைபெறுகிறது. அதிலும், அதிக தங்கம் வாங்கப்படும் மாநிலமாக தமிழகம் தொடர்ந்து முதலிடத்தில் உள்ளது. தமிழகத்தில் மட்டும் ஆண்டுதோறும் சராசரியாக 150 முதல் 200 டன் வரை தங்கம் விற்பனையாகிறது. இதில் 70 முதல் 80 சதவீதம் தங்கம் திருமணங்களுக்காகவே வாங்கப்படுவதாகக் கூறப்படுகிறது.

தமிழகத்தில் பெண் பிள்ளைகளை பெற்றவர்கள், மகளின் திருமணத்திற்காக அவள் சிறு வயது முதலே சிறுகச் சிறுகப் பணம் சேமித்து வைப்பது வழக்கம். தபால் நிலையம், வங்கி, காப்பீட்டுத் திட்டங்கள் உள்ளிட்ட பல வழிகளில் இந்தச் சேமிப்பு நடைபெறுகிறது. ஒன்றரை ஆண்டுகளுக்கு முன்பு, ஒரு தந்தை தனது மகளின் திருமணத்திற்காக ரூ.5 லட்சம் சேமித்து வைத்திருந்தால், ஒரு பவுன் தங்கம் ரூ.50 ஆயிரம் என்ற விலையில் 10 பவுன் நகையை வாங்க முடிந்தது. ஆனால் இன்று தங்கத்தின் விலை வரலாறு காணாத அளவுக்கு உயர்ந்துள்ளதால், அதே ரூ.5 லட்சத்தில் 4 பவுன் நகையைக்கூட முழுமையாக வாங்க முடியாத நிலை ஏற்பட்டுள்ளது.