கரூர் தொகுதி காலியானதாக அறிவிப்பு

எம்.எல்.ஏ.க்கள் ராஜினாமா

த.வெ.க. கூட்டணி அரசின் பெரும்பான்மையை நிரூபிக்க, கடந்த மே 13-ந்தேதி சட்டசபையில் நம்பிக்கை வாக்கெடுப்பு நடந்தது. இதில் எடப்பாடி பழனிசாமியின் உத்தரவை மீறி சி.வி.சண்முகம் உள்ளிட்ட 25 பேரும் த.வெ.க. அரசுக்கு ஆதரவளித்தனர். இதையடுத்து அவர்கள் மீது நடவடிக்கை எடுக்க வேண்டும் என்று சபாநாயகர் ஜே.சி.டி.பிரபாகரிடம் எடப்பாடி பழனிசாமி தரப்பு சார்பில் புகார் அளிக்கப்பட்டது.

அந்த மனு ஆய்வில் இருந்தபோதே 25 பேர் பிரிவில் இருந்த சத்தியபாமா, மரகதம் குமரவேல், ஜெயக்குமார், இசக்கி சுப்பையா ஆகியோர் தங்களது எம்.எல்.ஏ. பதவியை அடுத்தடுத்து ராஜினாமா செய்தனர். அதைத் தொடர்ந்து அவர்கள் வெற்றி பெற்றிருந்த 4 சட்டமன்ற தொகுதிகளும் காலியானதாக அறிவிக்கப்பட்டது.

இந்த நிலையில் அ.தி.மு.க. தலைவர்களிடையே மனமாற்றம் ஏற்பட்டது. இருபிரிவினரும் இணைந்து செயல்பட முடிவு செய்தனர். ராஜினாமா செய்த 4 பேர் தவிர மீதமுள்ள 21 பேரையும் (சி.விஜயபாஸ்கர், எம்.ஆர்.விஜயபாஸ்கர், சி.வி.சண்முகம் உள்பட) அவர்கள் கேட்டுக்கொண்டுள்ளபடி மன்னித்துவிடலாம். அவர்கள் மீது கட்சித்தாவல் தடைசட்டப்படி நடவடிக்கை எடுக்க வேண்டாம் என்று சபாநாயகரிடம் எடப்பாடி பழனிசாமி கடிதம் கொடுத்தார்.

அதை ஏற்றுக் கொண்டு, 21 பேர் மீதான மன்னிப்பும் ஏற்கப்படுவதாகவும், ராஜினாமா செய்துள்ள 4 பேர் மீது கட்சித்தாவல் தடைசட்டத்தின் கீழ் நடவடிக்கை தொடங்க இருப்பதாகவும் சபாநாயகர் ஜே.சி.டி.பிரபாகர் சமீபத்தில் அறிவித்தார். மேலும், அந்த 4 பேருக்கும் ஒரு வாரகால விளக்க நோட்டீஸ் அனுப்பப்பட்டது. அதற்கு அவர்கள் விளக்கமும் அளித்துவிட்டனர்.