நெல்லையப்பர் கோவில் ஆனித்திருவிழா தேரோட்டம் கோலாகலம்: பல்லாயிரக்கணக்கான பக்தர்கள் வடம் பிடித்து இழுத்தனர்

கண்காணிப்பு பணி

தேரோட்டத்தையொட்டி நெல்லை மட்டுமல்லாது வெளிமாவட்ட காவல்துறையினர் என்று சுமார் 1200 போலீசார் பாதுகாப்பு பணியில் ஈடுபடுத்தப்பட்டனர். தேரோட்ட பாதுகாப்பு பணிக்காக பிரத்யேகமாக 3 டிரோன் காமிராக்கள் மற்றும் 280 கண்காணிப்பு காமிராக்கள் மூலம் நெல்லையப்பர் காந்திமதியம்மன் கோவிலின் உட்புறமும், வெளிபுறம் நான்கு ரதவீதிகளும் கண்காணிக்கப்பட்டு வருகிறது.

மேலும் கூட்டநெரிசலில் குற்றங்கள் எதுவும் நடக்காமல் தடுப்பதற்காக குற்றப்பிரிவு காவலர்களை கொண்ட 10 குழுக்கள் அமைக்கப்பட்டு இருந்தன. அவர்கள் பக்தர்களுடன் பக்தர்களாக கலந்து கண்காணித்தனர். மேலும் ஒலிப்பெருக்கி, எச்சரிக்கை பலகைகள், துண்டு பிரசுரங்கள் ஆகியவற்றின் மூலம் பொது மக்கள் எச்சரிக்கையுடன் இருக்க விழிப்புணர்வு ஏற்படுத்தப்பட்டது. ரதவீதிகளில் உயர் கோபுரங்கள் அமைத்து குற்றங்கள் எதுவும் நடக்காமல் கண்காணிக்கப்பட்டது.

கோவிலை சுற்றியுள்ள ரதவீதிகளில் காவல் உதவி மையங்கள் அமைக்கப்பட்டு காணாமல் போனவர்கள் பற்றிய விபரங்களையும், காவல் துறைக்கு தெரிவிக்க வேண்டிய ஏனைய விவரங்களையும் அம்மையங்களில் உள்ள காவலர்களிடம் தெரிவிக்க வசதி செய்யப்பட்டு இருந்தது.

அதுமட்டுமின்றி பொது மக்கள் மற்றும் பக்தர்களின் வசதிக்காக 24 மணி நேரமும் செயல்படும் ஆம்புலன்ஸ் சேவை ஏற்பாடு செய்யப்பட்டு இருந்தது. போக்குவரத்து நெருக்கடியை குறைக்கும் வகையில் பேட்டை கண்டியப்பேரி, மவுண்ட் ரோடு, காட்சி மண்டபம் பகுதிகளின் வழியாக ரத

வீதிகளுக்குள் வாகனங்கள் நுழைவதை தடுத்திட பேரிகார்டுகள் அமைத்து போலீசார் காவல் பணியில் ஈடுபட்டனர்.

பல்லாயிரக்கணக்கான பக்தர்களின் வருகையால் முன்எச்சரிக்கை நடவடிக்கையாக மருத்துவக்குழுவும் ஏற்பாடு செய்யப்பட்டு இருந்தது. குழந்தைகள் காணாமல் போய்விடுவதை தடுக்க அவர்களது கைகளில் டேக் கட்டப்பட்டு அதில் பெற்றோரின் பெயர், செல்போன் எண் எழுதி அனுப்பி வைக்கப்பட்டனர்.

காலையிலேயே வெயிலின் தாக்கம் அதிகமாக இருந்ததால் தேர் வடம் பிடித்து இழுக்கும் பக்தர்களுக்கு உழவார பணி குழுவினர் சார்பில் குடங்களில் குடிநீர் எடுத்துவரப்பட்டு கொடுக்கப்பட்டது. இதேபோல் பக்தர்களுக்கு விசிறிகளும் வழங்கப்பட்டன. நடமாடும் கழிப்பறைகள் ஆகியவை ஏற்பாடு செய்யப்பட்டிருந்தன.