ராமர் கோவில் நன்கொடை திருட்டு ஒட்டுமொத்த சமூகத்தின் நம்பிக்கையையும் புண்படுத்தியுள்ளது- ஆர்.எஸ்.எஸ். பொதுச் செயலாளர்

ஆர்.எஸ்.எஸ். பொதுச் செயலாளர் தத்தாத்ரேயா ஹோசபாலே

அயோத்தி ராமர் கோவில் நன்கொடை திருட்டு தொடர்பாக ஆர்.எஸ்.எஸ். பொதுச் செயலாளர் தத்தாத்ரேயா ஹோசபாலே கூறுகையில் "விசாரணைக்குப் பிறகு குற்றவாளி எனக் கண்டறியப்படும் எவரும் கடுமையான தண்டனையை எதிர்கொள்வதை உறுதி செய்வது அவசியம். ராமர் கோயிலில் நன்கொடை திருட்டு என்ற துரதிர்ஷ்டவசமான சம்பவத்தால் நாங்கள் அனைவரும் மிகுந்த வேதனையும் கோபமும் அடைந்துள்ளோம். இந்த சம்பவத்தை பயன்படுத்தி இந்து விரோத, தேச விரோத சக்திகள் இந்து தர்மத்தை களங்கப்படுத்த முயல்கின்றன. அயோத்தியில் நடந்த ராமர் கோவில் நன்கொடைத் திருட்டு, ஒட்டுமொத்த சமூகத்தின் உணர்வுகளையும் நம்பிக்கையையும் மிகவும் புண்படுத்தியுள்ளது" எனத் தெரிவித்துள்ளார்.

உத்தர பிரதேசத்தில் முதல்வர் யோகி ஆதித்யநாத் தலைமையில் பா.ஜ.க. ஆட்சி நடக்கிறது. இங்குள்ள அயோத்தி ராமர் கோவிலுக்கு, பக்தர்கள் காணிக்கையாக செலுத்திய தொகையில் இருந்து கோடிக்கணக்கில் பணம் சுருட்டப்பட்டதாக எழுந்த குற்றச்சாட்டு பெரும் அதிர்வலைகளை ஏற்படுத்தியது. இது தொடர்பாக விசாரணை நடத்தி வரும் சிறப்பு புலனாய்வு குழு அதிகாரிகள் இதுவரை எட்டு பேரை கைது செய்துள்ளனர்.

இந்த முறைகேடுகளுக்கு தார்மிக பொறுப்பேற்று, ராம ஜென்ம பூமி ஷேத்ரா அறக்கட்டளையின் பொதுச் செயலாளர் பதவியை ராஜினாமா செய்த சம்பத் ராயிடமும், போலீசார் விசாரணை நடத்தினர்.