பெட்ரோல், டீசல் மீதான கலால் வரி குறைப்பு - மத்திய அரசு நடவடிக்கை

அதன்படி பெட்ரோல் மீதான கலால் வரி லிட்டருக்கு ரூ.13-லிருந்து ரூ.3 ஆக குறைக்கப்பட்டுள்ளது. டீசல் மீது கலால் வரி ரூ.10 ஆக இருந்த நிலையில் அது முழுமையாக ரத்து செய்யப்பட்டு பூஜ்யம் என்ற நிலைக்கு கொண்டு வரப்பட்டு உள்ளது. இந்த வரிக்குறைப்பு நடவடிக்கைகள் உடனடியாக அமலுக்கு வரும் என்று அமைச்சகம் தெரிவித்துள்ளது.

கடந்த பிப்ரவரி 28-ந் தேதி போர் தொடங்கிய பிறகு சர்வதேச சந்தையில் கச்சா எண்ணெய் விலை சுமார் 50 சதவீதம் உயர்ந்த போதிலும் இந்தியாவில் சில்லறை பெட்ரோல்-டீசல் விலைகள் மாற்றமின்றி வைக்கப்பட்டுள்ளன.

மத்திய அரசு கேட்டு கொண்டதையடுத்து இந்தியன் ஆயில், பாரத் பெட்ரோலியம், இந்துஸ்தான் பெட்ரோலியம் ஆகிய நிறுவனங்கள் நஷ்டத்தை ஏற்றுக்கொண்டு விலையை உயர்த்தவில்லை.

ஆனால் நயாரா நிறுவனம் விலையை அதிகரித்ததை தொடர்ந்து மற்ற எண்ணெய் நிறுவனங்களும் விலையை ஏற்றலாம் என்று தகவல் வெளியானது.

இதற்கிடையே எண்ணெய் நிறுவனங்களின் நஷ்டத்தை ஈடுகட்டும் நோக்கிலும், சர்வதேச கச்சா எண்ணெய் விலை உயர்விலிருந்து நுகர்வோரை பாதுகாக்கவும் இந்த கலால் வரி குறைப்பு நடவடிக்கையை மத்திய அரசு எடுத்து உள்ளது.

சர்வதேச கச்சா எண்ணெய் விலைகள் உயர்ந்து வருவதை சமாளிக்க எண்ணெய் விற்பனை நிறுவனங்களுக்கு இந்த வரி குறைப்பு உதவும்.

இந்த கலால் வரி குறைப்பால் பொதுமக்களுக்கு விற்பனை செய்யப்படும் பெட்ரோல், டீசல் விலை குறையாது. அதேவேளையில் விலையில் எவ்வித மாற்றமும் ஏற்படாது.

எரிபொருள் நெருக்கடி காரணமாக இலங்கை, பாகிஸ்தான் உள்ளிட்ட பல நாடுகளில் பெட்ரோல்-டீசல் விலை கடுமையாக உயர்த்தப்பட்டுள்ளது. பிலிப்பைன்சில் எரிபொருள் விற்பனையில் அவசர நிலை பிரகடனப்படுத்தப்பட்டு உள்ளது.

இந்தியாவில் பெட்ரோல்-டீசல் விலை உயர்வை தடுக்க மத்திய அரசு தீவிர நடவடிக்கை எடுத்து வருகிறது. 60 நாட்களுக்கு பெட்ரோல்-டீசல் இருப்பு உள்ளது என்று தெரிவித்து உள்ளது. மேலும் ஈரானுடன் பேச்சுவார்த்தை நடத்தி ஹார்முஸ் ஜலசந்தி வழியாக இந்திய கப்பல்கள் பயணம் மேற்கொள்ள அனுமதியை பெற்று உள்ளது என்பது குறிப்பிடத்தக்கது.