திமுக எம்.பி. அண்ணாதுரை வீட்டில் லஞ்ச ஒழிப்புத்துறை சோதனை

வேங்கிக்கால் தென்றல் நகர் பகுதியில் உள்ள அண்ணாதுரை வீட்டில் சோதனை நடத்தப்பட்டு வருகிறது.
Annadurai
Published on: 
Summary

திமுக எம்பி சி.என். அண்ணாதுரை வீட்டில் லஞ்ச ஒழிப்புத்துறை சோதனை நடத்தி வருகிறது.

திருவண்ணாமலை தி.மு.க. எம்.பி. சி.என். அண்ணாதுரை. இவர் தி.மு.க.வில் மாவட்ட இளைஞர் அணி அமைப்பாளராக உள்ளார்.

லஞ்ச ஒழிப்பு சோதனை

திருவண்ணாமலை வேங்கிக்கால் தென்றல்ந கரில் குடும்பத்துடன் வசித்து வருகிறார். இன்று காலை 8 மணிக்கு 10 பேர் கொண்ட லஞ்ச ஒழிப்பு போலீசார் இவரது வீட்டில் அதிரடியாக நுழைந்தனர்.

உடனே வீட்டின் கதவுகள் பூட்டப்பட்டன. வீட்டு முன்பு போலீஸ் பாதுகாப்பு போடப்பட்டது. இதனைத் தொடர்ந்து வீட்டில் அதிரடியாக சோதனை நடத்தினர். வீட்டில் இருந்த அண்ணாதுரை எம்.பி.யின் குடும்பத்தினரிடம் விசாரணை நடத்தினர்.

அண்ணாதுரை எம்.பி.யின் சொந்த ஊரான தேவனாம்பட்டு கிராமத்தில் உள்ள அவரது வீட்டிலும் லஞ்ச ஒழிப்பு போலீசார் அதிரடியாக நுழைந்து சோதனையில் ஈடுபட்டனர்.

மேலும் செங்கம் ரோட்டில் அண்ணாதுரை எம்.பி.க்கு சொந்தமான கல் குவாரி உள்ளது. இங்கும் சோதனை நடந்ததாக தகவல் பரவியது.

ஏரி மண்

கடந்த தி.மு.க. ஆட்சியின்போது மு.க.ஸ்டாலின் நிகழ்ச்சிக்காக மலப்பம்பாடி ஏரியில் இருந்து மண் அள்ளப்பட்டது. இது தொடர்பாக அறப்போர் இயக்கம் சமீபத்தில் வீடியோ வெளியிட்டு புகார் எழுப்பியிருந்தது. ஏரியில் மண் அள்ளிய கட்டுமான நிறுவனம் அண்ணாதுரை எம்.பி.க்கு சொந்தமானது என்பதால் இந்த சோதனை நடப்பதாக தகவல் வெளியாகி உள்ளது.

திருவண்ணாமலை தொகுதி

திருவண்ணாமலை தொகுதியில் சி.என். அண்ணாதுரை 2-வது முறையாக வெற்றி பெற்று எம்.பி.யாக உள்ளார். முன்னாள் அமைச்சர் எ.வ. வேலுவின் நம்பிக்கைக்குரியவர். தற்போது மதுராந்தகம் இடைத்தேர்தல் பணியில் அண்ணா துரை ஈடுபட்டுள்ளார். நேற்று இரவு கூட அந்த தொகுதி தேர்தல் பணியில் இருந்ததாக கட்சியினர் தெரிவித்தனர்.

இந்த நிலையில் அவரது வீடுகளில் லஞ்ச ஒழிப்பு போலீசார் சோதனை நடத்தி வருகின்றனர். கடந்த 3 மாதங்களுக்கு முன்பு திருவண்ணாமலையில் உள்ள முன்னாள் அமைச்சர் எ.வ.வேலு வீடுகளில் லஞ்ச ஒழிப்பு சோதனை நடந்தது. தற்போது அண்ணாதுரை எம்.பி. வீட்டில் சோதனை நடந்து வருவது தி.மு.க.வினரிடையே பரபரப்பை ஏற்படுத்தியது.

X