நடிகரும், தமிழக வெற்றிக் கழகம் கட்சியின் தலைவருமான விஜய் சமீபத்தில் தனது கட்சியின் முதல் மாநில மாநாட்டை விக்கிரவாண்டியில் நடத்தி முடித்தார். தமிழக வெற்றிக் கழகம் கட்சியின் முதல் மாநில மாநாட்டில் அக்கட்சி கொள்கைகள் அறிவிக்கப்பட்டன. த.வெ.க. கொள்கைகள் மற்றும் அக்கட்சி தலைவர் விஜய் பேசிய உரை குறித்து அரசியல் தலைவர்கள் எதிர்ப்பு மற்றும் ஆதரவுக்குரல் எழுப்பினர்.
கட்சி தொடர்பான அறிவிப்பை வெளியிடும் போதே, த.வெ.க. கட்சி 2026 சட்டமன்ற தேர்தலில் தான் போட்டியிடும் என்று அக்கட்சி தலைவர் விஜய் அறிவித்து இருந்தார். இந்த நிலையில் 2026 சட்டமன்ற தேர்தலில் த.வெ.க. தலைவர் விஜய் தர்மபுரி தொகுதியில் போட்டியிடுவதாக தகவல் வெளியாகி உள்ளது.
மேலும் இதே தகவலை தர்மபுரி மாவட்ட த.வெ.க. தலைவர் சிவா உறுதிப்படுத்தி இருப்பதாக கூறப்படுகிறது. இது தொடர்பாக தர்மபுரியில் நடைபெற்ற த.வெ.க. வழக்கறிஞர் பிரிவு ஆலோசனை கூட்டத்தில் பேசும் போது த.வெ.க. தர்மரபுரி மாவட்ட தலைவர் சிவா, "தர்மபுரி மாவட்டத்தில் உள்ள சட்டமன்ற தொகுதிகளில் ஏதேனும் ஒரு தொகுதியில் விஜய் போட்டியிடுவார்" என்று கூறியதாக தகவல்.
