காங்கிரஸ் - தமாகா நேருக்குநேர் மோதும் கிள்ளியூர் தொகுதி கண்ணோட்டம்

காங்கிரஸ் கட்சியும், தமிழ் மாநில காங்கிரஸ் கட்சியும் நேருக்குநேர் மோத உள்ளன. தமாகா சார்பில் ஜூட் தேவ், காங்கிரஸ் சார்பில் தற்போதைய எம்எல்ஏ ராஜேஷ் குமார் களம் காண்கின்றனர்.

மாலை மலர்

Published:14th Mar, 2021 at 11:09 AM

குமரி மாவட்டத்தின் முக்கிய தொகுதிகளில் ஒன்று கிள்ளியூர். குமரி மாவட்டத்தை தாய் தமிழகத்துடன் இணைய போராட்டம் நடத்திய மூத்த தலைவர்கள் நேசமணி, பொன்னப்ப நாடார் ஆகியோரை வெற்றி பெறவைத்த தொகுதி.

இத்தொகுதிக்குட்பட்ட புதுக்கடையில்தான் மொழிப்போர் தியாகிகளின் நினைவு ஸ்தூபியும் அமைந்துள்ளது. நீண்ட கடற்கரை கிராமங்களும் இத்தொகுதிக்குள் வருகிறது.

இங்கு பிரசித்தி பெற்ற இந்து கோவில்கள் உள்ளன. குறிப்பாக 12 சிவாலயங்களில் முதல் சிவாலயமான முன்சிறை மகாதேவர் கோவில் இத்தொகுதிக்குள்தான் வருகிறது. அதோடு பிரசித்தி பெற்ற பல கிறிஸ்தவ ஆலயங்களும் இங்குள்ளன. அதோடு புகழ்பெற்ற பள்ளி வாசல்களும் இத்தொகுதிக்குள் உள்ளது.

கிள்ளியூர் தொகுதியில் மொத்தம் 2 லட்சத்து 52 ஆயிரத்து 770 வாக்காளர்கள் உள்ளனர். இவர்களில் 1 லட்சத்து 27 ஆயிரத்து 379 ஆண்களும், 1 லட்சத்து 25 ஆயிரத்து 372 பெண்களும் உள்ளனர். இவர்களோடு 3-ம் பாலினத்தவர் 19 பேர் உள்ளனர்.

இத்தொகுதிக்குள் இனயம் புத்தன்துறை, கொல்லஞ்சி, மத்திகோடு உள்ளிட்ட ஊர்கள் உள்ளன. 16 ஊராட்சிகள், 7 டவுண் பஞ்சாயத்துகளும் இடம் பெற்றுள்ளது.

இத்தொகுதிக்குள் இந்து மற்றும் கிறிஸ்தவ நாடார் சமூகத்தினரே அதிக அளவில் வசிக்கிறார்கள். இவர்கள் சுமார் 78 சதவீதம் பேர் உள்ளனர். இவர்களை தவிர மீனவர்கள், ஆசாரிமார், நாயர் மற்றும் பிற சாதியினரும் உள்ளனர்.