ஸ்ரீவைகுண்டம் தொகுதி கண்ணோட்டம்

சண்முகநாதன் இரண்டு முறை தொடர்ச்சியாக வெற்றி பெற்றுள்ள மீண்டும் அதிமுக சார்பில் போட்டியிட அவருக்கே வாய்ப்பு வழங்கப்பட்டுள்ளது.

Published:8th Mar, 2021 at 3:41 PM

தூத்துக்குடி மாவட்டத்தில் உள்ள சட்டமன்ற தொகுதிகளில் முக்கியமான தொகுதியாக ஸ்ரீவைகுண்டம் உள்ளது. தாமிரபரணி கரையோரம் அமைந்துள்ளதால் இந்த தொகுதியின் பிரதான தொழில் விவசாயம்.

வி.ஐ.பி. அந்தஸ்தை பெற்ற இந்த தொகுதியில் சி.பா. ஆதித்தனார், ஏ.பி.சி. வீரபாகு போன்ற முக்கிய தலைவர்கள் வென்றுள்ளனர். இந்த தொகுதியில் இந்து, கிறிஸ்தவர், இஸ்லாமியர் என அனைத்து சமுதாயத்தினரும் பரவலாக உள்ளனர். நவதிருப்பதி, நவகைலாயம் போன்ற ஆன்மீக ஸ்தலங்கள் உள்ளன.

ஸ்ரீவைகுண்டம், ஏரல், சாத்தான்குளம் ஆகிய 3 தாலுகாக்களை உள்ளடக்கிய தொகுதியாகவும் உள்ளது. மறுசீரமைப்பில் சாத்தான்குளம் தொகுதி நீக்கப்பட்டதால் அந்த தொகுதியின் பெரும்பாலான பகுதிகள் ஸ்ரீவைகுண்டம் தொகுதியுடன் இணைக்கப்பட்டன. சாத்தான்குளம் தாலுகா முழுவதும், ஸ்ரீவைகுண்டம், திருச்செந்தூர் தாலுகாக்களில் பகுதியளவு இந்த தொகுதியில் உள்ளன. சாயர்புரம், ஸ்ரீவைகுண்டம், பெருங்குளம், ஏரல், ஆழ்வார்திருநகரி போன்ற பேரூராட்சிகள் இந்த தொகுதியில் அடங்கி உள்ளன.

இந்த தொகுதி 1957-ம் ஆண்டு உருவாக்கப்பட்டது. 2009 இடைத்தேர்தலையும் சேர்த்து இதுவரை 15 தேர்தல்களை சந்தித்துள்ளது. இதில் 7 முறை காங்கிரஸ் வென்றுள்ளது. இதில் 1957, 1962 தேர்தல்களில் காங்கிரஸ் சார்பில் ஏ.பி.சி. வீரபாகு வென்றுள்ளார். தி.மு.க. 3 முறையும் வென்றுள்ளது. 1967, 1971 தேர்தல்களில் தி.மு.க. சார்பில் சி.பா. ஆதித்தனார் வென்றுள்ளார். அடுத்ததாக அ.தி.மு.க. 5 முறையும் வெற்றி பெற்றுள்ளது.

ஸ்ரீவைகுண்டம் சட்டமன்ற தொகுதியில் ஆண் வாக்காளர்கள் 1 லட்சத்து 10 ஆயிரத்து 132 பேரும், பெண் வாக்காளர்கள் 1 லட்சத்து 13 ஆயிரத்து 622 பேரும், 3&ம் பாலித்தனவர்கள் 10 பேர் என மொத்தம் 2 லட்சத்து 23 ஆயிரத்து 764 வாக்காளர்கள் உள்ளனர்.

ஸ்ரீவைகுண்டம் தொகுதியில் நாடார்கள் 40 சதவீதமும், பிள்ளைமார்கள், பட்டியல் இனத்தவர்கள் தலா 20 சதவீதமும், அடுத்தபடியாக தேவர் இனமக்களும் உள்ளனர். இதுதவிர ஏனைய சமுதாய மக்களும் குறிப்பிட்ட அளவில் உள்ளனர்.