துலீப் கோப்பை இறுதிப் போட்டி சென்னைக்கு மாற்றம் - பி.சி.சி.ஐ. சொன்ன முக்கிய காரணம்

பி.சி.சி.ஐ. அறிக்கை:

"2026-27 துலீப் கோப்பையின் இறுதிப் போட்டி, பெங்களூருவில் உள்ள சென்டர் ஆஃப் எக்சலன்ஸ்-இல் இருந்து (CoE) சென்னையில் உள்ள எம்.ஏ. சிதம்பரம் மைதானத்திற்கு மாற்றப்பட்டுள்ளது. செப்டம்பர் 6 முதல் 10 வரை நடைபெறும் இந்த முக்கிய உள்ளூர் போட்டியில் பார்வையாளர்கள் கலந்துகொள்ளவும், இறுதிப் போட்டியை மைதானத்தில் நேரடியாக காணவும் அனுமதிக்கும் வகையில் இந்த முடிவு எடுக்கப்பட்டுள்ளது," என்று பி.சி.சி.ஐ. வெளியிட்ட அறிக்கையில் தெரிவிக்கப்பட்டுள்ளது.

"துலீப் கோப்பையின் மீதமுள்ள போட்டிகள், ஆகஸ்ட் 23 ஆம் தேதி CoE-இல் திட்டமிட்டபடி தொடரும். இதில் கிழக்கு மண்டலம் வடகிழக்கு மண்டலத்தையும், வடக்கு மண்டலம் மேற்கு மண்டலத்தையும் எதிர்கொள்ளும்," என்று அது மேலும் கூறியது.

2026-27 ஆம் ஆண்டுக்கான துலீப் கோப்பை போட்டி தொடரில் ஆறு அணிகள் பங்கேற்கின்றன. இந்தப் பதிப்பிற்காக, இந்த தொடர் அதன் பாரம்பரிய மண்டல வடிவத்திற்கு திரும்பியுள்ளது. ஆகஸ்ட் 23 முதல் செப்டம்பர் 10 வரை நடைபெறும் இந்த தொடரில் போட்டியிடும் ஆறு மண்டல அணிகள் மத்திய மண்டலம், தெற்கு மண்டலம், கிழக்கு மண்டலம், மேற்கு மண்டலம், வடக்கு மண்டலம் மற்றும் வடகிழக்கு மண்டலம் ஆகும்.