திருவேற்காடு தேவிகருமாரியம்மன் கோவில் வரலாறு

தமிழகம் தாய்தெய்வ வழிபாட்டின் சிறப்பிடமாகத் தொன்றுதொட்டு விளங்கிவரும் பகுதியாகும். சாக்தம் என்ப்படும் தாய் தெய்வ வழிபாடு தமிழகத்தில் பல்வேறு இடங்களில் காணப்படுகின்றன. அத்தகைய வரிசையில் திருவேற்காடு தேவி கருமாரியம்மன் திருக்கோவில் புகழ் பெற்ற சக்தி தலமாகும்.

தொண்டை மண்டலத்தில் உள்ள பாடல் பெற்ற தலங்களில் திருவேற்காடு 23வது தலமாகும். நாயன்மார்களில் மூர்க்க நாயனார் அவதரித்த ஊர் திருவேற்காடு என்பதும் குறிப்பிடத்தக்கதாகும். வெள்வேல் மரங்கள் மிகுந்த பகுதி என்பதால் இப்பெயர் பெற்றது. இவ்வூர் சென்னைக்கு மேற்குத் திசையில் 18 கி.மீ தொலைவில் உள்ளது.

கோவில் அமைப்பு

மூலதெய்வமான கருமாரியம்மன் கிழக்குப் பார்த்து அமர்ந்த நிலையில் காணப்படுகின்றாள். கருவறை, அர்த்த மண்டபம், மகா மண்டபம், முன்மண்டபம் திருச்சுற்று வளாகம் ஆகிய அனைத்தும், தற்காலக் கட்டுமானங்களாகும்.

முதல் திருச்சுற்று தெய்வங்களாகத் திருக்கோயிலின் முன்புறம், கிழக்குத் திசை நோக்கி வலம்புரி விநாயகர் சன்னதியும், வடகிழக்கில் சீனிவாசப்பெருமாள் சன்னதியும், தென் கிழக்கில் நவக்கிரக சன்னதியும், வடமேற்கில் வேற்கண்ணியம்மன் சன்னதியும், வடக்கில் தென்திசை நோக்கி முருகன் சன்னதியும், மரச்சிலையம்மன் சன்னதியும் உள்ளன.

இரண்டாம் திருச்சுற்று தெய்வங்களாகத், தெற்கில் தென்திசை கடவுளான தட்சிணாமூர்த்தி சன்னதியும், தென் மேற்கில் அங்காள பரமேஸ்வரி சன்னதியும், கிழக்குத் திசை நோக்கி பிரத்தியங்கரா தேவி சன்னதியும், ஏழு அம்மன் சன்னதியும், வள்ளி தெய்வானையுடன்முருகன் சன்னதியும், வடக்குத் திசை நோக்கி துர்க்கை சன்னதியும், தென்திசை நோக்கி பைரவர் சன்னதியும் அமைந்துள்ளன.

திருக்கோவிலின் கிழக்குப்புறத்தில் ஐந்து நிலை இராஜகோபுரம் அமைந்துள்ளது. இதன் எதிரில் திருநீற்றுப்பொய்கை எனப்படும் திருக்குளம் அமைந்துள்ளது. கோவிலின் வடகிழக்கில் புற்றுக்கோவில் உள்ளது. இரண்டு திருச்சுற்றுடன் கூடிய திருக்கோவிலாகும்.

தல வரலாறு

பிரளயத்தின் யுகமுடிவில் வெள்ளம் பெருகி உலகை மூழ்கவைத்தப்பின் சிவபெருமான் மீண்டும் உலகைப் படைக்க எண்ணினார். வெள்ளம் வற்றியப்பின் வேதங்களைக் குறிப்பிட்ட இடத்தில் மரங்களாக உருவாக்கினார். அவற்றின் அடியில் லிங்கம் தோன்றியது. லிங்கத்துடன் அன்னையும் தோன்றினாள்.

அன்னையின் அருளால் மீண்டும் தேவர்களும், மும்முர்த்திகளும் தோன்றினர். மீண்டும் அகில அண்ட இயக்கம் ஆரம்பமானது. இவ்வாறு வெள்வேல மரமும், அதனடியில் லிங்கமும், அன்னையும் தோன்றிய இடம் திருவேற்காடு. தேவர்கள் தோன்றிய அவ்விடத்தின் ஒரு பகுதி தேவர் கண்ட மடு என்று அழைக்கப்பட்டது. இந்த வேற்காடு பாலி ஆற்றின் கரையில் அமைந்துள்ளது.