ஆன்மிக வழிபாடு பற்றிய அரிய தகவல்கள்

பிருங்கி முனிவர் தவமியற்றிய மலை

சென்னை அருகே உள்ளது பரங்கிமலை என்ற பகுதி. பிருங்கி என்ற முனிவர், சிவபெருமானின் மீது அதீத பக்தி கொண்டவர். அவரைத் தவிர, அவர் அருகில் வீற்றிருக்கும் அன்னை பார்வதிதேவியைக் கூட வணங்க மறுப்பவர். ‘தனியாக அமர்ந்திருப்பதால் தானே ஈசனை மட்டும் சுற்றி வந்து பிருங்கி முனிவர் வணங்கிச் செல்கிறார்’ என்று நினைத்த பார்வதி தேவி, ஈசனின் அருகில் ஒட்டியபடி அமர்ந்திருந்தார். அப்போது பிருங்கி முனிவர், வண்டு உருவம் கொண்டு இறைவனை மட்டும் சுற்றி வந்து வழிபட்டுச் சென்றார். இதனால் கோபம் கொண்ட பார்வதி தேவி, பிருங்கி முனிவருக்கு சாபம் கொடுத்தார். அந்த சாபம் நீங்க பிருங்கி முனிவர் பூலோகம் வந்து தவம் செய்த இடம் ‘பிருங்கி மலை’ என்று அழைக்கப்பட்டது. அதுவே நாளடைவில் மருவி ‘பரங்கிமலை’ என்று ஆனதாக கூறப் படுகிறது.

பிரச்சினை தீர்க்கும் பைரவர்

ஒவ்வொரு சிவன் கோவில்களிலும் விநாயகர் சன்னிதி, முருகன் சன்னிதி, அம்பாள் சன்னிதி போல, மற்றொரு முக்கியமான சன்னிதியாக திகழ்வது பைரவர் சன்னிதி. பைரவருக்கு உகந்த நாள் தேய்பிறை அஷ்டமி. அன்றையதினம் வடை மாலை சாற்றி, பைரவரை வணங்கினால் வழக்குகள், வீண் பிரச்சினைகள், அபாண்டமான குற்றச்சாட்டுக்கள் போன்றவற்றில் இருந்து விடுபடலாம்.