ஆவரைகுளம் அதிசய தெய்வம் ஸ்ரீ முத்தாரம்மன்

எல்லை இல்லா அருள்பரப்பி ஏகமெங்கும் நிறைந்திருக்கும் அருள்மிகு ஸ்ரீ முத்தாரம்மன் வீற்றிருக்கும் ஆலயம் நெல்லை குமரி எல்லையில் பழவூர் அருகில் ஆவரைகுளம் எனும் அற்புத ஊரில் அமையப் பெற்றுள்ளது. ஆவரை குளத்தில் வசிக்கும் மக்களின் முன்னோடிகள் தூத்துக்குடி மாவட்டம் குரும்பூரில் குடியிருந்தவர்கள் என்பது வரலாற்று உண்மை. விவசாயம் தான் இவர்களது பிரதான தொழில். இது விவசாய பூமி என்பதால் ஆவாரைப்பூக்கள் பூத்துக் குலுங்கியதால் ஆரம்பத்தில் ஆவாரைகுளம் என அழைக்கப்பட்டு பின் அது மருவி ஆவரைகுளம் ஆகிவிட்டது.

ஆவரைகுளம் ஊரை சேர்ந்த பெட்டிய பரதேசி என்பவர் அரசூர் பூச்சிக் காட்டை சேர்ந்த உலகளந்தாள் என்ற பெண்ணை திருமணம் செய்து தனக்கு துணைவியாக் கினார்.உலகளந்தாளுக்கு கணவன் மீது எவ்வளவு பாசமோ அதே அளவுக்கு பூச்சிக்காட்டில் அருள் செய்த முத்தாரம்மன் மீதும் பாசம். அதனால், தான் பிறந்த மண்ணைவிட்டு வரும் போது முத்தாரம்மன் கோவிலில் இருந்து பிடிமண்ணை எடுத்து வந்தார். அந்த பிடிமண்ணை வைத்து முத்தாரம்மனுக்கு பீடம் அமைத்து அதற்கு மேல் ஓலைக்கூரை வேய்ந்து தினமும் அம்மனை வழிபட்டு வந்தாள்.