கடல்நீரை மாயமாக்கிய அகத்தியர் வரலாறு

வேத காலம், இதிகாச காலம் தொடங்கி, பின்னர் தமிழிலும் நூல்கள் புனைந்த அகத்தியர் பன்னெடுங்காலம் வாழ்ந்தவராக இருக்க வேண்டும். அவரின் அபாரமான அறிவாற்றலால் சம்ஸ்க்ருதம், தமிழ் ஆகிய இரு மொழிகளும் தழைத்தன.

சிவபுராணம், விநாயகர் புராணம் உள்ளிட்ட பல்வேறு புராணங்களில் அகத்தியரைப் பற்றிய செய்திகள் இடம்பெற்றுள்ளன. சிவனுக்கும் பார்வதி தேவிக்கும் நடைபெற்ற திருமணத்தைக் காண எல்லா தேவர்களும் இமயமலைக்கு விரைந்தார்கள். இமயமலை இருந்த வடக்குப் பகுதி தாழத் தொடங்கியது. உலகைத் தடுமாறாமல் சமன் செய்து நிலை நிறுத்த வேண்டுமே?.

சிவபெருமான் அகத்தியரை விந்திய மலையைத் தாண்டித் தெற்கே செல்லுமாறு அறிவுறுத்தினார். அவர் கட்டளைப்படியே அகத்தியர் தமிழகம் வந்தார். அகத்தியர் ஒருவரே அத்தனை தேவர்களுக்கும் சமமானவர் ஆகையால் வையம் தடுமாறாமல் நிலைநின்றது என்கிறது சிவபுராணம்.

காவிரி தோன்றிய கதை:

விநாயகபுராணத்தில் காவிரி தோன்றிய கதை சொல்லப்படுகிறது. அகத்தியரின் மனைவி லோபமுத்ரா நீர் வடிவம் உடையவள். அவளைத் தம் கமண்டலத்தில் தாங்கி நடந்தார் அகத்தியர்.

அவர் கமண்டலத்தைக் கீழே வைத்துவிட்டு ஜபதபங்களில் ஈடுபட்டபோது, காக வடிவாய் வந்த விநாயகர் தம் அலகால் கமண்டலத்தைத் தட்டிவிட்டார். உள்ளிருந்த தண்ணீர் பெருக்கெடுத்து ஆறாய் ஓடியது.

அந்த நீரே காவிரி ஆயிற்று. தான் சென்ற இடமெல்லாம் சோலைகளை விரித்துச் சென்றது காவிரி. கா என்றால் சோலை. எனவே அந்த வகையில்தான் காவிரிக்குப் பெயர் ஏற்பட்டது.

கடலைக் குடித்த அகத்தியர் கதை:

அகத்தியர் கடல் முழுவதையும் அருந்தியதாக ஒரு கதை உண்டு. தாரகன் என்ற அரக்கன் கடலுக்குள் ஒளிய இந்திரன் அவனை அழிக்க வழிதெரியாமல் திகைத்தான். அகத்தியரை அணுகி உதவி பெறுமாறு அறிவுறுத்தினார் பிரம்மதேவர். அவ்விதமே அகத்தியரிடம் உதவி கேட்டான் இந்திரன்.

அதற்கென்ன எனக் கடல்முன் வந்து நின்ற அகத்தியர், கையால் அள்ளிக் கடல் முழுவதையும் குடித்துவிட்டார். நீரின்றி வறண்ட கடல் நிலத்திற்குள் பிரவேசித்து தாரகனை வதம் செய்தான் இந்திரன். பின் மீண்டும் அவன் அகத்தியரிடம் வேண்ட அகத்தியர் தான் அருந்திய கடலை உமிழவே கடல்நீர் மறுபடித் தோன்றியது என்கிறது அந்தக் கதை. கம்ப ராமாயணத்திலும் இந்தக் கதை இடம்பெற்றுள்ளது.