ஆரோக்கியம் நம் கையில் - ஆழ்ந்த தூக்கம் தரும் முத்திரைகள்

ஆழ்ந்த தூக்கம் தரும் முத்திரைகள் தொடர்பாக யோகக் கலைமாமணி பி.கிருஷ்ணன் பாலாஜி விளக்கம் அளித்துள்ளார்.

Published:2nd Mar, 2022 at 4:40 PM

மனிதர்கள் அவரவர்கள் வயதிற்கேற்ப காலை முதல் இரவு வரை பல வகையான வேலைகளில் ஈடுபடுகின்றனர். இரவு நேரத்தில் 9 மணி முதல் அதிகாலை 3 மணி வரை ஆழ்ந்த தூக்கம் ஒரு மனிதனுக்கு வேண்டும். இந்த நேரத்தில் ஆழ்ந்த நித்திரை கிடைத்தால் உடல் ஆரோக்கியமாக இருக்கும்.

இன்றைய சூழ்நிலையில் இரவு 9 மணிக்கு படுக்கைக்கு செல்வது நிறைய குடும்பங்களில் சாத்தியமில்லாததாக இருக்கலாம். அப்படிப் பட்டவர்கள் இரவு 10 மணிக்கு தூங்கி காலை 5 மணி வரை ஆழ்ந்த நித்திரை இருக்க வேண்டும்.

அதுவும் சாத்தியமில்லை என்றால் இரவு 10.30 மணிக்குள் படுக்கைக்கு சென்று காலை 5.30 மணி வரை ஆழ்ந்த நித்திரை இருக்க வேண்டும். இரவு 11 மணி முதல் காலை 3 மணி வரை நாம் நல்ல தூக்கத்தில் இருக்க வேண்டும். அந்த நேரத்தில் தான் நமது உடலில் உள்ள ராஜ உறுப்புகளான கல்லீரல், மண்ணீரல், சிறுநீரகம், சிறுநீரகப்பை, இதயம், நுரையீரல் நன்கு பிராண சக்தி பெற்று மீண்டும் மறு நாள் சிறப்பாக உழைப்பதற்கு தயாராகின்றது.

இந்த நேரத்தில் நாம் விழித்திருந்தால் உடல் ஆரோக்கியம் இருக்காது. மன அமைதியும் இல்லாமல் உடலில் பல வித உறுப்புக்கள், நாளமில்லா சுரப்பிகள் ஒழுங்காக செயல்படாமல் பல இன்னல்களுக்கு ஆளா கின்றோம்.

நிறைய நபர்கள் தூக்க மாத்திரை சாப்பிடு கின்றனர். அதைச் சாப்பிட்டும் தூக்கம் வராமல் அவதிப்படுபவர்களும் ஏராளம். மாத்திரை சாப்பிடுவதால் பக்க விளைவுகள் அதிகம் ஏற்படுகின்றது. நரம்பு பலவீனம் உடல் நடுக்கம், பய உணர்வு, பதட்டம் ஏற்படுகின்றது. மூச்சோட்ட மண்டலம் பாதிக்கின்றது.

மனிதனுக்கு தினமும் இரவு நல்ல தூக்கம் இருந்தால் தான் ஆரோக்கியம் சிறப்பாக இருக்கும். இந்த தூக்கம் வருவதற்குரிய யோகா முத்திரை பயிற்சியை நாம் தெளிவாக காணப்போகின்றோம். அதற்கு முன்பாக உடல், மனதை நல்ல தூக்கம் வருவதற்கு எப்படி வைத்துக் கொள்ள வேண்டும் என்பதையும் நாம் அறிந்து கொள்வது அவசியமாகின்றது.

மன அழுத்தம்:நிறைய நபர்களுக்கு மன அழுத்தம் அதிகமாக இருக்கும். வாழ்வில் அன்றாடம் நடக்கும் சின்ன சின்ன வி‌ஷயங்களில் கோபம், பதட்டம், கவலை அடைவார்கள். இவர்கள் இரவு பத்து மணிக்கு படுத்தாலும் தூக்கம் வராது. அன்று வீட்டில், அல்லது அலுவலகத்தில் நிகழ்ந்த சம்பவங்கள் எண்ணங்களாக, காட்சிகளாக வந்து கொண்டே இருக்கும். எதையும் வாழ்வில் ஏற்றுக் கொள்ளும் மனோ பக்குவம் வர வேண்டும். என்ன நடந்தாலும் அதை பெரிது படுத்தி பார்க்கக் கூடாது. அப்படிப்பட்ட மனோநிலையை பெறுவதற்குரிய யோகப் பயிற்சிகளைத்தான் நாம் பார்க்கப்போகின்றோம் .