காலநிலை மாற்றத்தால் பேரடி வாங்கும் ஐரோப்பிய பொருளாதாரம்: பில்லியன் கணக்கில் குவியும் நிதியிழப்பு!

கப்பல் போக்குவரத்து மற்றும் வர்த்தக முடக்கம்

ஐரோப்பாவின் முக்கிய வணிக நதிகளான ரைன் மற்றும் டானூப் ஆகியவற்றில் நீர்மட்டம் மிகக் குறைந்த அளவை எட்டியுள்ளது.இதனால் சரக்குக் கப்பல்கள் முழு கொள்ளளவுடன் செல்ல முடியாமல் வர்த்தகம் முடங்கியுள்ளது. ING வங்கியின் கூற்றுப்படி, ரைன் நதிப் போக்குவரத்து தடையால் ஜெர்மனியின் ஜிடிபி 0.3% குறைய வாய்ப்புள்ளது.

மின் உற்பத்தி முடக்கம்

ஆறுகளில் நீர்மட்டம் சரிந்ததாலும், நீரின் வெப்பநிலை உயர்ந்ததாலும், அணுமின் நிலையங்களைக் குளிரூட்ட நீர் கிடைக்காத சூழல் உருவாகியுள்ளது. இதனால் பிரான்ஸ் மற்றும் ஹங்கேரி ஆகிய நாடுகளில் உள்ள பல அணுமின் உலைகள் உற்பத்தியைக் குறைக்கவும், தற்காலிகமாக மூடவும் நிர்பந்திக்கப்பட்டுள்ளன. ஹங்கேரியின் முக்கிய அணுமின் நிலையம் ஒரு வாரம் முடங்கினாலும் நாட்டின் ஜிடிபியில் 0.1% இழப்பு ஏற்படும் என MBH வங்கி தெரிவித்துள்ளது.

விவசாயம் மற்றும் உணவுப் பணவீக்கம்

கடும் வறட்சியால் மக்காச்சோளம் மற்றும் சூரியகாந்தி விளைச்சல் 6% முதல் 7% வரை சரிந்துள்ளது. பார்சிலோனா சூப்பர் கம்ப்யூட்டிங் மையத்தின் ஆய்வின்படி, இதுபோன்ற வெப்ப அலைகள் உணவுப் பொருட்களின் விலையை உயர்த்தி, ஐரோப்பிய மண்டலத்தின் பணவீக்கத்தை 0.34% வரை உயர்த்துகின்றன.

சுற்றுலாத் துறையில் ஏற்படும் மாற்றங்கள்

தெற்கு ஐரோப்பிய நாடுகளான ஸ்பெயின், இத்தாலி மற்றும் கிரீஸ் ஆகியவற்றில் வெப்பநிலை 45°C வரை பதிவாவதால், கோடைகால சுற்றுலா பயணிகள் எண்ணிக்கை குறையத் தொடங்கியுள்ளது. சுற்றுலாப் பயணிகள் தங்களின் பயணங்களை வடக்கு ஐரோப்பிய நாடுகளுக்கோ அல்லது குளிர்ச்சியான மாதங்களுகோ மாற்றியமைப்பதால், தெற்கு ஐரோப்பிய வணிகங்கள் கடும் நஷ்டத்தை எதிர்நோக்குகின்றன.

மனித உயிரிழப்புகள்

தீவிர வெப்பத்தால் தொழிலாளர்களின் உற்பத்தித்திறன் கடுமையாகப் பாதிக்கப்பட்டுள்ளது. ஜெர்மனியில் மட்டுமே வெப்ப அலை காரணமாக 10,000-க்கும் மேற்பட்ட உயிரிழப்புகள் பதிவாகியுள்ளன.

வரி வருவாய் சரிவு

தொழில் வர்த்தக முடக்கத்தால் பிரான்ஸ் நாட்டின் வருடாந்திர வரி வருவாய் 1.8% வரையிலும், இத்தாலி மற்றும் ஸ்பெயின் நாடுகளின் வரி வருவாய் 1.3% வரையிலும் குறையும் என மதிப்பிடப்பட்டுள்ளது.

வட்டி விகித நெருக்கடி

பேரிடர் நிவாரணம், தீயணைப்பு மற்றும் மின் விநியோக சீரமைப்பு என அவசர கால செலவுகள் அதிகரித்துக் கொண்டே செல்கின்றன. ஏற்கனவே அதிகக் கடனில் இருக்கும் பிரான்ஸ், இத்தாலி போன்ற நாடுகள், காலநிலை மாற்றத்தை எதிர்கொள்ள கூடுதல் கடன் வாங்க வேண்டிய நிலைக்குத் தள்ளப்படுவதால், ஐரோப்பிய மத்திய வங்கிக்கு வட்டி விகிதங்களைக் கட்டுப்படுத்துவதில் சிக்கல் உருவாகியுள்ளது.

வெப்ப அலை, வறட்சி மற்றும் காட்டுத்தீ ஆகிய பேரிடர்கள் ஒரே நேரத்தில் தாக்குவதால், ஐரோப்பிய நாடுகள் இனி தற்காலிக நிவாரணங்களை மட்டுமே நம்பியிருக்காமல், நீண்டகால உள்கட்டமைப்பு மாற்றங்களில் பில்லியன் கணக்கில் முதலீடு செய்வது மட்டுமே பொருளாதார பாதுகாப்பை உறுதி செய்யும் எனப் பொருளாதார நிபுணர்கள் சுட்டிக்காட்டுகின்றனர்.