மானிய ஸ்கூட்டருக்கு விண்ணப்பிக்க அலைமோதிய பெண்கள் கூட்டம்

கூட்டம் அதிகமாக இருக்கும் மண்டலங்களில் கூடுதலாக கவுண்டர்கள் திறக்கவும் ஏற்பாடு செய்யப்பட்டிருந்தது. செனாய் நகரில் உள்ள மாநகராட்சி மண்டல அலுவலகத்தில் விண்ணப்பிக்க பெண்கள் நீண்ட வரிசையில் காத்து நின்றனர்.

அவர்களில் சிலர் தங்கள் கருத்துக்களை நம்மிடம் பகிர்ந்து கொண்டனர்.

ரேகா (கீழ்ப்பாக்கம் கார்டன்):- நான் சொந்தமாக ஜெராக்ஸ் கடை நடத்தி வருகிறேன். கடைக்கு தினமும் பஸ்சில் சென்று வருகிறேன். இந்த திட்டம் மூலம் மானிய விலையில் ஸ்கூட்டர் கிடைத்தால் எனக்கு உதவியாக இருக்கும். கடைக்கு செல்வதற்கு மட்டுமின்றி என் குழந்தைகளை பள்ளிக்கு சென்று விடுவதற்கும் இது பயனுள்ளதாக இருக்கும். குழந்தைகளை ஆட்டோவில் அனுப்புவது பாதுகாப்பாக இல்லை. ஸ்கூட்டர் இருந்தால் நானே கொண்டு போய் விட்டு விடுவேன்.

இந்த திட்டம் தகுதியானவர்களுக்கு கிடைத்தால் நல்லது. இதை வரவேற்கிறோம்.

ஜென்சி வினோவின் (அயனாவரம்):- நான் டெய்லரிங் படித்து ஒரு நிறுவனத்தில் வேலை செய்து வருகிறேன். வருவாய் சான்றிதழ் வாங்குவதற்கு 1 வாரமாக அலைந்தேன். விண்ணப்பிக்க மிக குறுகிய காலமே கொடுத்ததால் பலரால் இந்த வாய்ப்பை பயன்படுத்த முடியவில்லை. மேலும் 1 வாரம் கால அவகாசம் கொடுத்தால் பெண்களுக்கு உதவியாக இருக்கும். இன்று கடைசி நாள் என்பதால் நாங்கள் வெள்ளிக்கிழமை வந்தோம் அன்று விண்ணப்பிக்க முடியவில்லை. மறுநாள் வந்தால் அன்று அலுவலகம் திறக்கவில்லை. அதனால் இன்று காலை 8 மணிக்கே வரிசையில் வந்து நின்று விட்டேன். எப்படியாவது விண்ணப்பித்து விட்டுத்தான் செல்வேன். வேலை செய்யும் நிறுவனங்களில் சான்றிதழ் வாங்குவது கஷ்டமாக உள்ளது. ஒரு சிலர் கொடுக்கிறார்கள். சில நிறுவனங்களில் தர மறுக்கிறார்கள். இது போன்ற சூழ்நிலையை கருத்தில் கொண்டு விண்ணப்பத்தை ஆய்வு செய்து முறையான வர்களுக்கு ஸ்கூட்டர் வழங்க வேண்டும்.

மோனிஷா (அமைந்தகரை):- நான் ஒரு ஏற்றுமதி நிறுவனத்தில் வேலை செய்து வருகிறேன். தினமும் பஸ்சில் வேலைக்கு சென்று வருகிறேன். விண்ணப்பிக்க நான் 3 நாட்களாக அலைகிறேன். இன்று கடைசி நாள் என்பதால் காலையிலேயே வந்து விட்டேன். வேலை செய்யும் பெண்கள் இந்த ஆவணங்களை பெறுவதற்கு அரசு கொடுத்துள்ள கால அவகாசம் போதுமானதல்ல. மேலும் சில நாட்கள் அவ காசம் வழங்க வேண்டும். இந்த திட்டம் ஏழை, எளிய, நடுத்தர குடும்ப பெண் களுக்கு உதவியாக இருக்கும். தகுதியானவர் களுக்கு எந்த வித இடைத்தரகரும் இல்லாமல் ஸ்கூட்டர் வாங்க மானியம் வழங்க வேண்டும்.

செண்பகவல்லி (அமைந்தகரை):- நான் டேட்டா என்ட்ரி பணி செய்து வருகிறேன். பூந்தமல்லியில் இருந்து வேலைக்கு செல்கிறேன். தினமும் பஸ்சில் செல்வதால் இப்போது அதற்கான செலவு அதிகரித்து விட்டது. அரசின் ஸ்கூட்டர் மானியம் கிடைத்தால் செலவு குறைவதோடு மற்ற பணிகளை செய்யவும் உதவியாக இருக்கும். அலுவலகத்துக்கு குறிப்பிட்ட நேரத்துக்கு செல்லவும், திரும்பி வரவும் முடியும். எனவே எங்களைப்போன்ற வேலை செய்யும் பெண்களுக்கு மானியம் மூலம் ஸ்கூட்டர் வாங்க உதவி செய்தால் நன்றாக இருக்கும்.

தீபிகா (சூளைமேடு):- நான் மயிலாப்பூரில் உள்ள ஒரு தனியார் நிறுவனத்தில் வேலை செய்து வருகிறேன். தினமும் பஸ்சில் வேலைக்கு சென்று வருகிறேன். தற்போது பஸ் கட்டணமாக தினமும் 88 ரூபாய் செலவிடுகிறேன். 12 கி.மீ. தூரம் உள்ள அலுவலகத்தக்கு ஸ்கூட்டரில் சென்றால் தினமும் 20 ரூபாய் தான் செலவாகும். பெண்களுக்கு பாதுகாப்பான இந்த திட்டத்தை நான் வரவேற்கிறேன். இதை ஏதோ கண் துடைப்புக்காக செய்து விடக்கூடாது. பெண்கள் அதிக அளவு பயன் பெற வேண்டுமானால் மேலும் சில நாட்கள் விண்ணப்பிக்க அவகாசம் தர வேண்டும்.

இவ்வாறு அவர்கள் கூறினார்கள். #tamilnews